د کډوالۍ نړۍوال سازمان له پاکستانه د راستنېدونکو وضعیت ته د رسېدنې لپاره د بېړنۍ مرستې او د مناسبو شرایطو تر برابرېدو پورې د هغوی د ایستلو لړۍ درېدو غوښتنه کړې ده.
له پاکستانه د افغان کډوالو د جبري ایستلو لپاره ټاکل شوی ضربالاجل د روان میلادي کال د مارچ په ۳۱مه پای ته ورسېد. اوس هره ورځ ډېر شمېر افغان کورنۍ په اجباري توګه له پاکستانه اخراجېږي او خپل هېواد ته راستنېږي.
په هغې اعلامیه کې چې نن د کډوالۍ نړۍوال سازمان له لوري خپره شوې راغلي چې یوازې د اپرېل له درېیمې بیا د مې تر درېیمې نېټې پورې څه باندې ۱۰۹ زره افغانان له پاکستانه هېواد ته راستانه شوي دي.
ایاواېم ویلي، د کډوالو د راستنېدو دا څپه د نړۍوالو بنسټونو د اندېښنو لامل شوې ده.
د کډوالۍ نړۍوال سازمان له ۶۰۰ تر ۱٫۵ میلیون راستنو شوو افغانانو وضعیت ته د رسېدنې لپاره د بېړنۍ مرستې غوښتونکی دی.
د ایاواېم عملیاتي مرستیال اوګوشي دانیلز ویلي: «ډېری خلک چې افغانستان ته راستنېږي، په سخت زیانمنونکي حالت کې دي. هغوی خپلو کورونه، شتمني او کارونه په پاکستان کې له لاسه ورکړي دي؛ مېرمنې او نجونې چې ډېرې له خطر سره مخ دي، ډېری یې له کورنیو جلا شوې او بنسټیزو خدمتونو ته لاسرسی نه لري.»
د کډوالۍ نړۍوال سازمان له ایرانه د افغان راستنېدونکو کډوالو وضعیت هم اندېښمنوونکی بللی دی.
ورته مهال، د کډوالۍ نړۍوال سازمان اعلان کړی چې د روان کال له جنورۍ تر اپرېل میاشتې پورې له ایرانه څه باندې ۲۶۵ زره بې اسناده افغان کډوال افغانستان ته راستانه شوي چې ۷۴ سلنه یې په اجباري توګه ایستل شوي دي.
یاد سازمان او شریکانو یې یو ځل بیا له نورو کوربه هېوادونو غوښتي څو د افغانانو اجباري ایستل تر هغو چې د هغوی داوطلبانه، خوندي او باعزته راستنېدو لپاره مناسبه شرایط نه وي برابر شوي، ودروي.
اوګوشي دانیلز ویلي، د کډوالۍ نړۍوال سازمان چمتو دی چې په کلیدي ورودي برخو کې خپل عملیات پراخه کړي خو پرته د بېړنۍ بودجې له تامین څخه به دغه ناورین ته رسېدنه او له زیانمنو ټولنو څخه ملاتړ ډېر محدود وي.
Views: 11
