د سره صلیب او سرې میاشتې نړۍوال فدراسیون (IFRC) لیکلي چې به پاکستان کې د کډوالۍ له لسیزو ژوند وروسته ممکن یو میلیون داسې افغانان چې معتبره ویزې نهلري، د ۲۰۲۵ کال د مارچ له ۳۱مې نېټې وروسته افغانستان ته ستنېدو ته اړ شي.
یاد فدراسیون په داسې کې چې لیکلي یې دي، «له پاکستانه د افغانانو ستنېدل بشري وضعیت لا ترینګلی کولای شي»، د یاد وضعیت په غبرګون کې ويلي، اوسمهال د یادو راستنو شوو کسانو له ډلې د ۵۰ زره کسانو اوږدمهال او بېړنیو اړتیاوو ته د ځواب ویلو لپاره د افغاني سرې میاشتې د ټولنې ملاتړ کوي.
خبرپاڼه کې راغلي چې یاد فدراسیون لومړی مبلغ چې ۷۵۰ زره سویسي فرانک دي، پېښو ته د ځواب ویلو له بېړني صندوق (DREF) څخه ځانګړي کړي څو د افغاني سرې میاشتې ټولنه وکولای شي له پاکستانه راستنېدونکو افغانانو لپاره بېړني خدمتونه، سرپناه، روغتیايي بېړني خدمات، خواړه او اوبه برابر کړي.
سرچینه زیاتوي: «افغانستان ته د راستنېدونکو کسانو بشردوستانه اړتیاوې ډېرې دي؛ ډېرو یې خپلې شتمنۍ په پاکستان کې پرېیښي؛ هغه ماشومان – چې ډېری یې پر خوارځواکۍ اخته دي- ځانګړي مراقبت ته اړتیا لري، ډېرې کورنۍ هم د سفر په جریان کې له یو بله جلا شوې او له خپلو غړو سره د یوځای کېدو لپاره مرستې ته اړتیا لري. دغهراز، له یادو خلکو سره دوامداره مرستې په افغانستان کې د هغوی د ژوند جوړولو په موخه دي.»
یاد بدلون داسې مهال رامنځته شوی چې مخکې له دې هم ډېر شمېر افغان کډوال افغانستان ته راستانه شوي دي.
د سره صلیب او سرې میاشتې نړۍوال فدراسیون د ملګرو ملتونو سازمان د شمېرو پر اساس لیکي چې د ۲۰۲۳ کال له سپټامبر راهیسې شاوخوا ۸۵۰ زره کسان له پاکستانه هېواد ته راستانه شوي او سره له دې له ایران څخه هم ګڼ شمېر افغانان هېواد ته راګرځېدلي دي.
د افغاني سرې میاشتې ټولنې سرپرست مولوي شهابالدین دلاور د چټک اقدام پر اړتیا ټینګار کړی او ویلي یې دي، هغه کسان چې راګرځي له بېلابېلو ستونزو سره مخ دي چې په یوازې توګه د هغوی اړتیاوو ته رسېدنه امکان نهلري.
هغه زیاتوي چې ډېری راستانه شوي، ښځې او ماشومان دي او د هغوی اړتیاوو ته رسېدنه باید لومړیتوب وي.
هغه ویلي: «زموږ موخه د بېړنیو مرستو رسول او له راستنوو شوو اوږدمهاله ملاتړ دی څو وکولای شي با عزته ژوند له سره پیل کړي.»
د سره صلیب او سرې میاشتې نړۍوال فدراسیون د استازولۍ سرپرست رییس احمد سلیمان ویلي: «دغه وضعیت به میلیونونه کسان اغېزمن کړي. بېړنیو اړتیاوو ته رسېدنه – لکه خواړه، روغتیایي مراقبت او سرپنا – زموږ اصلي لومړیتوب دی، په داسې حال کې چې هممهاله د اوږدمهاله ملاتړ لپاره هم پروګرام جوړوو، د سره صلیب او سرې میاشتې نړۍوال فدراسیون له ملي ټولنو او د افغانې سرې میاشتې ټولنې ترڅنګ هڅه کوي څو له خنډونو سره مقابله او له اړمنو څخه ملاتړ وکړي.»
د سره صلیب او سرې میاشتې نړۍوال فدراسیون ټینګار کوي چې د راستنېدو بهیر باید داوطلبانه او له انساني کرامت سره مل وي.
یاد فدراسیون دغهراز له نړۍوالې ټولنې غوښتي چې افغانستان ته د راستنېدونکو افغانانو بشري اړتیاوو ته د پوره ځواب ویلو لپاره کافي ملاتړ وړاندې کړي.
Views: 1
