د روسیې د بهرنیو چارو وزارت مرستیال اعلان کړی چې په اوکراین کې د جګړې د پای ته رسولو لپاره د امریکا متحده ایالاتو د سولې پلان په اوسنۍ بڼه د منلو وړ نه دی.
د ګارډین ورځپاڼې د راپور پر بنسټ، د روسیې د بهرنیو چارو د وزیر مرستیال سرګي ریابکوف ویلي چې دوی د امریکا وړاندیزونه او پلانونه جدي ګڼي؛ خو نه شي کولای دا ټول په اوسنۍ بڼه ومني.
هغه ویلي: «موږ د امریکایانو وړاندیز شوي ماډلونه او حل لارې ډېرې جدي نیسو؛ خو نه شو کولای دا ټول په اوسنۍ بڼه ومنو.»
د هغه په خبره، دغو پلانونو هغو مسايلو ته کومه پاملرنه نه ده کړې چې مسکو يې د جګړې اصلي ريښې ګڼي.
هغه څرګنده کړې: «په دغو وړاندیزونو کې زموږ اصلي غوښتنې ته یعنې د دې جګړې پای ته رسولو رېښتو ته هېڅ اشاره نه ده شوې. دا تشه باید ډکه شي.»
دغه څرګندونې وروسته له هغه کېږي چې له دې مخکې د امریکا ولسمشر ډونالډ ټرمپ د مسکو له لوري د هوکړې د بهیر پر سستوالي ناخوښي څرګنده کړې او ویلي یې وو، که روسیه د دې هوکړې پر وړاندې خنډ شي نو د دغه هېواد د تېلو پر اخیستونکو هېوادونو به بندیزونه ولګوي.
