د راپورونو له مخې، د افغانستان او پاکستان ترمنځ ترانزیټي سوداګري له ۶۶ سلنې کموالي سره مخ شوې ده.
پاکستانۍ ورځپاڼې «ډي نیشن» پرون په یوه راپور کې لیکلي چې د افغانستان او پاکستان ترمنځ ترانزیټي سوداګري د ۲۰۲۴ میلادي کال له جولای څخه بیا د ۲۰۲۵ کال تر فبرورۍ پورې له ۶۶ سلنې کموالي سره مخ شوې ده.
د دغه راپور له مخې، په سوداګرۍ کې د یاد کموالي ارزښت څه باندې یو میلیارد او ۴۸۹ میلیون ډالر ښودل شوی دی.
په راپور کې راغلي چې دغه کموالی په ټوله کې د توکو له قاچاق سره د مبارزې او د پاکستان له خوا د وارداتو محدویتونو له امله دی.
له بلې خوا، د صنعت او سوداګرۍ وزارت د وري په درېیمه د یوې خبرپاڼې په خپرولو سره په تېر لمریز کال کې د هېواد د سوداګرۍ بهیر د ښهوالي په حال کې بللی دی.
سرچینه لیکلي، افغانستان په ۱۴۰۳ کال کې د یو میلیارد او ۷۸۵ میلیون ډالرو په ارزښت صادرات او د ۱۱ میلیارد او ۱۶۴ میلیون ډالرو په ارزښت واردات درلودل.
په خبرپاڼه کې راغلي چې صادرات تر ډېره پاکستان، هند، متحده عربي اماراتو، ازبکستان، ایران، قزاقستان، چین، ترکیې، عراق او تاجکستان ته ترسره شوي دي.
د سرچینې په خبره، د هېواد صادراتو کې تر ډېره انځر، پنبه او ممیز شامل دي خو د غالیو، سرب او قیمتي او نیمه قیمتي ډبرو تولیدات بیا د صادراتو تر ټولو ډېر رقم جوړوي.
سرچینه کاږي چې ډېر وارداتو بیا له ایران، متحده عربي اماراتو، پاکستان، چین، ترکمنستان، ازبکستان، قزاقستان، روسیې، هند او مالیزیا څخه ترسره شوي دي.
د سرچینې د معلوماتو له مخې، ډېزل، پټرول، وړه، د نقلیه وسایطو پرزې، اوبلن ګاز، کتاني منسوجات، درمل، غوړي او وریجې تر ټولو ډېر وارداتي توکي جوړوي.
