د یوناما مشرې، افغانستان کې تر شپږم ټولګي پورته د نجونو زدهکړو د ځنډېدو پر دوام خواشيني څرګنده کړې ویلي یې دي چې دغه چاره د افغانانو سوکالي زیانمنوي او نړۍوال دې د پوهنې برخه کې له افغانانو ملاتړ وکړي.
افغانستان کې د ملګرو ملتونو مرستندویه پلاوي (یوناما) نن د یوې اعلامیې په خپرولو سره ویلي څلور کاله پوره کېږي چې تر شپږم ټولګي پورته د نجونو زدهکړې ځنډول شوې او دوی یې خواشیني کړي دي.
سرچینه زیاتوي چې دغه ځنډ د افغانستان «ناورین» نور هم پېچلی کوي.
د افغانستان لپاره د ملګرو ملتونو د سرمنشي ځانګړې استازې او په افغانستان کې د ملګرو ملتونو د مرستندویه پلاوي مشرې روزا اوتنبایوا ویلي: «په افغانستان کې نوی ښوونیز کال پیل شو، خو بیا هم په ټولګیو کې د نجونو له څرګند او زیانرسوونکي نشتوالي سره دا کړنه نه یوازې د دوی (نجونو) راتلونکې زیانمنوي، بلکې د ټولو افغانانو سولې او سوکالۍ ته هم زیان رسوي.»
اوتنبایوا ویلي چې د نجونو د زدهکړو ځنډېدل د افغانستان د بیارغونې امکانات کموي او باید لغوه شي.
د یوناما مشرې له نړۍوالو مرستندویه بنسټونو غوښتي چې د امکان تر بریده د پوهنې په برخه کې د افغانستان له خلکو ملاتړ ته دوام ورکړي.
په اعلامیه کې د یونیسف د معلوماتو له مخې راغلي چې تر دې دمه د نجونو د زدهکړو د ځنډ له امله ۲.۲ میلیونه افغان نجونې اغیزمنې شوي او څلور سوه زرو ته یې یوازې سږ کال زیان اوړي.
طالب چارواکو تراوسه د دې اعلامیې په اړه څه نه دي ویلي خو تر دې وړاندې یې ویلي چې د مناسبو شرایطو په برابرېدو سره به تر شپږم ټولګي پورته د نجونو ښوونځي او پوهنتونونه پرانیستل شي.
