د ننګرهار د اطلاعاتو او فرهنګ ریاست مسوولین وايي، ټاکل شوې چې تورخم دروازه نن ماذیګر څلور بجې د ترانزیټي موټرو او د راتلونکې جمعې په ورځ د عامو خلکو د تګ راتګ پر مخ پرانیستل شي.
د ننګرهار ولایت اطلاعاتو او فرهنګ ریاست رییس قاري ساجد خوګیاڼي پر خپله فسبوکپاڼه لیکلي، ټاکل شوې چې تورخم دروازه نن ماذیګر څلور بجې د هر ډول ترانزیټي موټرو او د راتلونکې جمعې په ورځ د عامو خلکو د تګ راتګ پر مخ پرانیستل شي.
یاد ریاست له دې مخکې د دغه ولایت د والي د مرستیال مولوي عزیزالله مصطفی له قوله خپاره کړي خبر کې ویلي وو چې تورخم لار به نن چهارشنبه ماسپښین یوه بجه د هر ډول تګ راتګ پر مخ پرانیستل شي.
د نوموړي په خبره، دغه پرېکړه تورخم کې د دواړو لورو د کمیسارانو په غونډه کې شوې ده.
تورخم دروازه شاوخوا یوه میاشت مخکې پاکستاني لوري د طالبانو له خوا د تاسیساتو جوړولو په غبرګون کې تړلې وه چې څو ځله پهکې د دواړو غاړو ترمنځ نښتې هم وشوې.
بل لور ته، د پاکستان له خوا د قومي مشرانو د جرګې مشر جواد حسین کاظمي هم ویلي چې نن لس بجې یې د لارې د خلاصون په تړاو له افغان کمیسار سره ناسته کړې ده.
د یادونې ده چې د پاکستان له خوا د دغې لارې د تړل کېدو له امله د دواړو غاړو سوداګرو ته میلیونونه ډالر زیان اوښتی دی.
Views: 9
