د تکواندو افغان لوبغاړي فرزاد منصوري بلجیم کې د تکواندو په نړۍوالو سیالیو کې خپل فرانسوي او هالنډي سیالانو ته په ماتې ورکولو سره دویم مقام ګټلی دی.
د تکواندو افغان لوبغاړي فرزاد منصوري نن پژواک ته وویل، د تکواندو «اوپن» سیالۍ چې د بلجیم په کوربهتوب پرون پیل شوې وې او ټاکل شوې نن پای ته ورسېږي، د امریکا، کاناډا او اروپایي هېوادونو د تکواندو لوبغاړو برخه اخیستې ده.
نوموړي وویل، د دغو یادو سیالیو په لومړي پړاو کې یې خپل فرانسوي سیال ته ماتې ورکړه او بیا یې هالنډي سیال ته په ماتې ورکولو سره په دغو سیالیو کې پایلوبې ته لاره پیدا کړه.
هغه زیاته کړه، په پایلوبه کې یې له خپل امریکایي سیال څخه ماتې وخوړه او د دویم مقام په ګټلو سره یې د نقرې مډال ترلاسه کړ.
دغه افغان ورزشکار اوسمهال د انګلستان په منچستر ښار کې ژوند کوي.
د یادونې ده چې فرازد منصوري شاوخوا یوه میاشت مخکې هم د ترکیې په کوربهتوب د تکواندو «اوپن G2» نړۍوالو سیالیو کې د برنزو مډال ګټلی و.
Views: 8
