د لبنان ولسمشر وايي، هوډ لري راتلونکې اونۍ سعودي عربستان ته په خپل سفر کې له دغه هېواده وغواړي چې د لبنان له پوځ سره کلنۍ درې میلیارد ډالري مرسته بېرته پيل کړي.
د راپورونو له مخې، لبنان ته د سعودي عربستان یاده مرسته وروسته له هغه بنده شوه چې لبنان په ایران کې د سعودي پر ډیپلوماتیکو ځایونو د بریدونو له غندنې ډډه کړې وه.
ټاکل شوې د لبنان ولسمشر جوزف عون د دوشنبې په ورځ په خپل لومړني بهرني سفر کې د عربستان له ولیعهد محمد بن سلمان سره لیدنه وکړي.
هغه پرون (جمعه) الشرق ټلوېزیون سره په خبرو کې ویلي چې له ریاض به وپوښتي چې «ایا امکان لري یاده مرسته چې په ۲۰۱۶ کال کې بنده شوې، بیا فعاله شي؟»
نوموړي زیاته کړه: «هيله او تمه لرو چې سعودي عربستان، په ځانګړې توګه ولیعهد زموږ ترمنځ اړیکې د دواړو هېوادونو په ګټه جوړې کړې.»
ټاکل شوې عون – چې د جنوري په ۹مه له ولسمشر کېدو مخکې د لبنان د پوځ مشر و- په خپل لومړني بهرني سفر کې د عربستان له ولیعهد سره لیدنه وکړي.
هغه هیله څرګنده کړې چې یاد سفر به د دواړو هېوادونو ترمنځ سیاسي او اقتصادي اړېکې ټینګې کړي.
Views: 15
