د کډوالۍ نړۍوال سازمان (IOM) په یوه راپور کې ویلي چې تېر ميلادي کال په افغانستان کې له نیم میلیون ډېر خلک د اقلیمي بدلونونو له امله د رامنځته شوو پېښو په پایله کې بېځایه شوي دي.
د کډوالۍ نړۍوال سازمان د یوه راپور په خپرولو اعلان کړی چې په افغانستان کې نږدې ۹ میلیون خلک د اقلیمي بدلونونو له خطرونو، لکه سېلابونو، وچکالیو او نورو طبیعي پیښو تر اغېز لاندې راغلي چې له دې ډلی څه باندې ۵۰۰ زره یې د خپلو مېنو پرېښودو ته اړ شوي دي.
دغه سازمان زیاته کړه چې له هرو پنځو بېځایه شوو کسانو درې یې په خپل اصلي ولایت کې له یوه ځایه بل ته کډه شوي، په داسې حال کې چې د هېواد په لوېدیځ هرات او فراه ولایتونو کې تر ټولو ډېر زیان اوښتی دی.
دغه راز، یاد سازمان خبرداری ورکړی چې په افغانستان کې څه باندې ۱۱ میلیون خلک په راتلونکي کې د اقلیمي بدلونونو له امله د رامنځته کېدونکو ناورینونو له جدي ګواښ سره مخ دي.
دا په داسې حال کې ده چې د اسلامي امارت چارواکو ټینګار کړی چې افغانستان په نړۍواله د اقلیمي بدلونونو له امله د زیان منونکو هېوادونو په نوملړ کې شپږم ځای لري او له نړۍوالې ټولنې یې غوښتي کړې څو دې برخه کې لا زیاته همکاري وکړي.
