له پېښو سره د مبارزې او چمتووالي اداره وایي، په هېواد کې د وروستیو ورښتونو له امله ۳۶ کسانو ژوند له لاسه ورکړی، ۴۰ نور ټپیان دي څه باندې ۳۰۰ کورنیو په نیمه او یا بشپړه توګه ویجاړ شوي دي.
له وړمې شپې راهیسې د هېواد په بېلابېلو ولایتونو کې واورې او بارانونه وشول چې په ځینو ولایتونو کې یې له امله سېلابونه هم راوتلي دي.
له پېښو سره د مبارزې او چمتووالي ادارې د اطلاعاتو او عامه اړیکو رییس او ویاند مولوي عبداللهجان سایق په یوه انځوریز کلپ کې ویلي، په هېواد کې د وروستیو ورښتونو له امله ۳۶ کسانو ژوند له لاسه ورکړی، ۴۰ نور ټپیان دي، ۲۴۰ کورونه په بشپړ ډول او ۶۱ کورونه په قسمي ډول ویجاړ شوي دي.
هغه ویلي چې دغه راز په ټول هېواد کې سلګونه جریب کرنیزې ځمکې هم له منځه تللې دي.
ده ویلي، د دغې ادارې د ژغورنې ټیمونه هغو سیمو ته رسېدلي چې د ورښتونو او سېلابونو له امله زیانمنې شوې دي.
سایق ویلي چې راتلونکي کال کې په پلان کې لري چې پېښو ته د چمتووالي د عامه پوهاوي پروژې پلې کړي.
سایق په دې اړه نور جزییات نه دي ورکړي خو د پژواک د راپورونو له مخې، ډېری سېلابونه او وروستیو ورښتونو ډېری مرګژوبله په کندهار، هلمند، فراه کې اړولې ده.
پخواني ولسمشر حامد کرزي هم پر خپله اېکسپاڼه د سېلابځپلو له کورنیو سره خواخوږي ښودلې او له مرستندویه بنسټونو او سوداګرو یې غوښتي څو له دغو کورنیو سره مرستې وکړي.
