د پاکستان حکومت پرېکړه کړې چې په نږدې راتلونکي کې به د ACC او POR کارتلرونکو په ګډون ټول افغان کډوال له اسلاماباد او راولپنډۍ ښارونو وباسي.
په اسلاماباد کې د افغانستان سفارت نن په یوه خبرپاڼه کې لیکلي، په دې وروستیو کې په اسلاماباد او راولپنډۍ کې افغان وګړي د پولیسو له لوري نیول کېږي، پلټل کېږي او ورته ویل کېږي چې له دغو ښارونو ووځي او د پاکستان نورو سیمو ته ولاړ شي.
د سرچینې د معلوماتو له مخې، د پاکستان د بهرنیو چارو وزارت چارواکو د افغانستان سفارت ته منلې چې له اسلاماباد او راولپنډۍ ښارونو او همداراز په نږدې راتلونکي کې له ټول پاکستانهACC او PoR لرونکي کډوالو د ایستلو پلان په قطعي او حتمي ډول پلی کوي.
په خبرپاڼه کې راغلي، د یادو چارواکو په وینا، دا د پاکستان د حکومت رسمي پرېکړه ده چې له دې وروسته به په اسلاماباد او راولپنډۍ کې یوازې هغه افغانان پاتې کیږي چې د دغه هېواد ویزې لري.
دغه راز، د ملګرو ملتونو د کډوالو عالي کمېشنرۍ ویلي، پاکستاني چارواکي وایي، ټول افغانان، پرته له هغو چې معتبرې ویزې لري، باید د ۲۰۲۵ کال د فبرورۍ تر ۲۸مې له اسلاماباد او راولپنډۍ څخه ووځي.
یو اېناېچسيار په یوه خبرپاڼه کې لیکلي، هغو کسانو ته چې د بیامېشتېدو یا لېږد پروګرامونو اړوند اسناد لري، د پاکستان حکومت له لوري ورته د مارچ تر ۳۱مې وخت ورکړل شوی.
دا په داسې حال کې ده چې د یادو ښارونو سربېره پاکستاني پولیسو د روان کال د سلواغې میاشتې په ۲۷مه په کوېټه ښار او کچلاغ سیمه کې د شپې ناوخته د یو شمېر افغان مهاجرینو پر کورونو چاپې وهلې وې او یو شمېر افغانان یې په زور له کورونو ایستلي او ناسم چلند یې ورسره کړی و.
Views: 13
