رويټرز د باوري سرچینو له قوله راپور ورکړی چې د امریکا بهرنیو چارو وزارت اړوند د افغان کډوالو د بیامېشتېدنې د هڅو د همغږۍ دفتر مسوولینو ته سپارښتنه شوې چې د روان کال په اپرېل میاشت کې د دغه دفتر تړلو ته چمتو شي.
د رويټرز په راپور کې راغلي چې د دې سپارښتنې عملي کېدو په صورت کې پر شرایطو برابر شاوخوا ۲۰۰ زره افغان کډوال امریکا ته له لېږدولو پاتې کېږي.
د افغان کډوالو مېشتېدنې یوه ملاتړي دغه اژانس ته ویلي، د افغان – امریکایي د پوځي پرسونل کورنیو غړي، ماشومان او په امریکا کې د مېشتو افغانانو خپلوان او لسګونه زره افغانان چې په تېرو ۲۰ کلونو کې یې په افغانستان کې د امریکا حکومت ته کار کړی، د هغو کسانو له ډلې دي چې ښایي د یاد دفتر له تړل کېدو سره امریکا ته له تلو پاتې شي.
د افغان ایواک په نوم د افغانانو بیامېشتېدنې یوې ملاتړې ادارې بنسټاېښودونکي شان ونډایور ویلي: «د دغه دفتر تړل کېدل به یوه ملي رسوایي، زموږ له افغان متحدینو او له هغو پخوانیو سرتېرو سره چې د دوی لپاره وجنګېدل او د امریکا له ژمنې سره یو خیانت وي.»
د افغانانو د لېږد او بیامېشتېدنې د هڅو د همغږۍ دفتر د ۲۰۲۱ میلادي کال په اګسټ کې له افغانستانه د امریکايي ځواکونو د وتلو پر مهال جوړ شو، څو هغه افغانان چې د امریکا له حکومت سره یې کار کړی و، دغه هېواد ته ولېږدوي.
دغه دفتر د ۲۰۲۲ میلادي کال په اکټوبر کې د هغو افغانانو برخه کې هم فعالیت پیل کړ چې د پناه اخیستو وړ پېژندل شوي وو او تر اوسه یې شاوخوا ۱۱۸ زره کسان امریکا ته انتقال کړي دي.
دوو سرچینو رويټرز ته ویلي چې د افغانانو د لېږد او بیامېشتېدنې دفتر تړل کېدو طرحه د امریکا د بهرنیو چارو وزیر مارکو روبیو ته چمتو شوې او د روبیو ترڅنګ د دفاع وزیر پيټ هګسټ، د کورني امنیت وزیر کریسټي نوم او د ټرمپ د ملي امنیت سلاکار والټز هغه کسان دي چې ښایي وروستی تصمیم ونیسي.
تر اوسه په دې اړه د امریکا د بهرنیو چارو وزارت څه نه دي ویلي.
د یادونې ده، د تخلیې او بیامېشتېدنې عملیات هغه مهال ودرېدل چې ټرمپ د کډوالو د ایستلو طرحه پیل کړه او د هغه د فرمان له مخې، له پاکستان او نورو هېوادونو د افغان کډوالو د انتقال پروګرام د ۹۰ ورځو او نورو څېړنو لپاره درول شوی دی.
Views: 10
