امریکايي رسنیو راپور ورکړی چې د امریکا په څو ایالتونو کې د سېلابونو او توپان له امله ۱۰ کسانو ژوند له لاسه ورکړی دی.
یاد سېلابونه په کنتاکي او تنسي ایالتونو کې له سخت ورښت څخه وروسته پيل شوي او اوس هم دوام لري.
د راپور له مخې، د کنتاکي په ایالت کې د شپې د سخت توپان له امله ورانونکی سېلاب راوتلی چې له امله یې لږ تر لږه ۹ کسانو ژوند له لاسه ورکړی دی.
د کنتاکي چارواکو اعلان کړی چې د ۲۴ ساعتونو څخه په کمه موده کې یې د پلټنې او ژغورنې څه باندې زر عملیات ترسره کړي او سلګونه کسان یې چې د سېلاب له امله بند پاتې وو، ژغورلي دي.
د جورجیا ایالت چارواکو هم اعلان کړی چې په دغه ایالت کې یو کس مړ شوی دی.
د راپور له مخې، تېره ورځ (یکشنبه، د سلواغې ۲۸مه) په یادو سیمو کې د اوبو کچه لوړه شوې او کورونه له اوبو لاندې شوي چې ګڼ شمېر یې وران شوي دي.
دا په داسې حال کې ده چې دوه کاله مخکې هم سخت سېلاب د کنتاکي ایالت ځینې سیمې ورانې کړې او د څه باندې ۴۰ کسانو ژوند یې واخیست.
Views: 2
