د راپورونو پر بنسټ، سعودي عربستان په اوکراین کې د جګړې پای ته رسېدو په تړاو د امریکا او روسیې د خبرو کوربهتوب کوي.
رویټرز خبري اژانس د امریکا د استازو جرګې د غړي مایکل مککال او یوې باوري سرچینې په حواله راپور ورکړی چې امریکايي او روسي چارواکي به په نږدې راتلونکي کې په اوکراین کې د روسیې د نږدې درې کلنې جکړې پای ته رسولو په موخه د خبرو اترو لپاره سعودي عربستان ته سفر وکړي.
د راپور له مخې، د امریکا د بهرنیو چارو وزیر مارکو روبیو، د سپینې ماڼۍ د ملي امنیت سلاکار مایک والټز او د منځني ختیځ لپاره د دغه هېواد ځانګړی استازی اسټیو ویټکوف به د امریکايي پلاوي برخه وي.
مککال د مونیخ امنیتي کنفرانس په څنډه کې ویلي چې د دغو خبرو اترو موخه د امریکا د ولسمشر ډونالډ ټرمپ، د روسیې د ولسمشر ولادیمیر پوتین او د اوکراین د ولسمشر ولادیمیر زیلینسکي ترمنځ د سولې د ټینګښت او جګړې د پای ته رسولو لپاره د لیدنې تنظیمول دي.
خو تر اوس دا په ډاګه نه ده چې د امریکا استازي به د روسیې له کومو استازو سره وګوري.
د امریکا د بهرنیو چارو وزارت هم تر اوسه په دې اړه څه نه دي ویلي.
دا په داسې حال کې ده چې مارکو روبیو په دې وروستیو کې د روسیې د بهرنیو چارو له وزیر سرګي لاوروف سره ټیلېفوني خبرې کړې دي.
Views: 2
