د پاناما ولسمشر ویلي چې د افغانستان، پاکستان، چین او ازبکستان د وګړو په ګډون ۱۱۹ پناهغوښتونکي خپلو هېوادونو ته د ستنولو په موخه له امریکا څخه دغه هېواد ته لېږدول شوي دي. د پاناما ولسمشر خوزه رائول مولینو ویلي چې دغه کډوال به وروسته خپلو هېوادونو ته ستانه کړل شي.
هغه زیاته کړې چې په دوو نورو الوتنو کې به ۳۶۰ نور غیرقانوني کډوال له امریکا څخه دغه هېواد ته واستول شي.
په یادو پناهغوښتونکو کې د افغان کډوالو په اړه نور معلومات نه دي ورکړل شوي.
دا په داسې حال کې ده چې تېره اونۍ د پاناما ولسمشر د امریکا د بهرنیو چارو له وزیر سره لیدنه کې ژمنه وکړه چې له امریکا سره به د ایستل کېدونکو کډوالو په منلو او بېرته خپلو هېوادونو ته ستنولو کې همکاري کوي.
امریکایي چارواکو ویلي چې دوی د غیرقانوني کډوالو د ایستلو لپاره له نورو هېوادونو سره د ورته تړونونو په اړه خبرې کوي.
له دې مخکې د امریکا ولسمشر ډونالډ ټرمپ په وار وار ټینګار کړی چې غیرقانوني کډوال له دغه هېواده ایستل کېږي.
Views: 7
