د هیئت تحریر شام ډلې مشر احمد شرع د انتقالې دورې لپاره د سوریې د حکومت د مشر په توګه ټاکل شوی دی.
د رویټرز راپور له مخې، یاده پرېکړه د چهارشنبې په ورځ د وسلهوالو ډلو د مشرانو او د موقت دولت وزیرانو په ناسته کې په دمشق کې وشوه.
په ناسته کې د سوریې د پخواني حکومت په ځنډولو سره احمد شرع ته دغهراز واک ورکړل شو چې د انتقالي دورې لپاره یوه لنډمهاله قانونجوړوونکې شورا جوړه کړي.
احمد شرع یادې ناستې ته په وینا کې وویل چې د سوریې لومړی لومړيتوب په مشروع او قانوني توګه په دولت کې د تشې ډکول دي.
هغه زیاته کړه چې مدني سوله باید د انتقالي عدالت او له غچه د مخنیوي له لارې خوندي پاتې شي، دولتي بنسټونه، په ځانګړې توګه نظامي او امنیتي ځواکونه باید ورغول شي او اقتصادي زیربناوې دې پراختیا ومومي.
شرع ژمنه کړې، په سوریه کې د سیاسي لېږد بهیر به مدیریت کړي چې په هغه کې د یوه ملي کنفرانس، ټولشموله دولت جوړېدل او بالاخره د ازادو ټاکنو ترسره کول دي او زیاته کړې یې ده چې یادې چارې ښايي څلور کاله وخت ونیسي.
ویل شوي، په یاده ناسته کې ۱۸ حاضرو وسلهوالو ډلو پر خپل انحلال هوکړه کړې ده.
د هیئت تحریر شام او د محمد الجولاني په مشرۍ د بشار اسد دولت مخالفې ډلې د جمعې په ورځ (د لېندۍ ۱۶مه) له دولتي ځواکونو سره له مقاومت پرته د حمص، دیرالزور او درعا ښارونه ونیول او ورپسې د سوريې پلازمېنې دمشق ته ننوتل او پر یاد هېواد یې د اسد کورنۍ څه باندې ۵۰ کلنه واکمني پای ته ورسوله.
Views: 7
