د راپورونو له مخې، د امریکا د ولسمشر له لوري پر مرستو د بندیز له امله د څه باندې ۴۰ زره هغو افغانانو الوتنې ځنډول شوې چې د کډوالۍ ځانګړو ویزو(SIV) پروګرام له لارې منل شوي دي.
د امریکا د ولسمشر ډونالډ ټرمپ د یوه اجرائیوي فرمان له مخې، په متحده ایالتونو کې د کډوالو د بیامېشتېدو پروګرامونه ځنډول شوي.
امریکایي چارواکي او د افغان کډوالو د ملاتړ یوې ادارې مسوولین وایي چې پر بهرنیو مرستو د متحده ایالتونو د ولسمشر ډونالډ ټرمپ له خوا د بندیز له امله د څه باندې ۴۰ زره هغو افغانانو الوتنې ځنډول شوې چې د کډوالۍ ځانګړو ویزو پروګرام ته منل شوي دي.
یو امریکایي چارواکي چې نه یې دې غوښتي نوم یې یاد شي او د افغانانو تخلیې په نوم د افغان کډوالو د مېشتېدو ایتلاف مشر شان وانډایور تېره ورځ رویټرز خبري اژانس ته ویلي چې د ځانګرو ويزو (SIV) پروګرامونو لپاره ډېری منل شوي افغانان دننه په افغانستان، پاکستان، قطر او البانیا کې دي.
د امریکا بهرنیو چارو وزیر مارکو روبیو تېره ورځ په یو یادښت کې له مصر او اسرائیل پرته پر ټولو هېوادونو بهرنۍ مرستې د درېیو میاشتو لپاره وځنډولې څو د دې مرستو اغېزناکتوب او دا چې څومره د امریکا له پالیسۍ سره برابرې دي معلوم شي.
د افغانانو د تخلیې د ایتلاف د دغه مسوول په خبره، له ۱۵۰ زره تر ۲۰۰ زره افغانان په دې تمه دي چې د کډوالۍ کېسونه یې بشپړ او امریکا ته ولاړ شي.
په افغانستان کې له سیاسي بدلون وروسته نږدې ۲۰۰ زره افغانان د SIV او کډوالۍ نورو پروګرامونو له لارې په متحده ایالتونو کې مېشت شوي چې د افغان تخلیې ایتلاف په ګډون نورې ادارې ورسره په بیا مېشتېدنه کې مرستې کوي.
د متحده ایالتونو د بهرنیو چارو وزارت د تېر کال د سپټمبر په راپور کې ویل شوي وو چې ۶۷۰۰۰ کسان چې د کډوالۍ ځانګړو ویزو له شرایطو سره برابر دي، وروستۍ تاییدۍ ته په تمه دي او ۱۱۰۰۰ نور افغانان بیا خپلو مرکو ته سترګې په لار دي.
د افغانانو لپاره د کډوالۍ ځانګړو ویزو پروګرام په ۲۰۰۹ کال پیل شو، د امریکا کانګرس په تېرو څو کلونو کې ۳۸۵۰۰ دا ډول ویزې تایید کړې دي.
Views: 11
