الماني رسنیو راپور ورکړی چې دغه هېواد په افغانستان کې واک ته د طالبانو له رسېدو راهیسې د دویم ځل لپاره یوه ډله نور «مجرم» افغان کډوال له خپلې خاورې وباسي.
رویټرز خبري اژانس د جرمني د کورنیو چارو وزارت د «زوددویچه تسایتونګ» په نوم ورځپاڼې په حواله اعلان کړی چې د دغو افغان کډوالو الوتنه به د یوه «سیمهییز شریک» په مرسته وشي.
د یادو افغان کډوالو د ایستلو کره وخت په اړه څه نه دي ویل شوي، خو د جرمني د اطلاعاتو وزارت د معلوماتو له مخې، ښايي دغه الوتنه د جرمني له سراسري ټاکنو لږ مخکې د راتلونکې ميلادي میاشتې په ۲۳مه ترسره شي.
دا په داسې حال کې ده چې په جرمني کې د یوه افغان له لوري د چاقو په وسیله له مرګوني برید وروسته د دغه هېواد د کورنیو چارو وزیر نانسي فیزر وویل چې د مجرمو کډوالو د ایستلو لپاره جدي کار کوي.
جرمني د افغان کډوالو ایستلو بهیر د روان لمریز کال د وږي په میاشت کې پیل کړی و او په لومړي پرواز کې یې له لایپزیګ هوايي ډګره ۲۸ افغانان کابل ته راولېږدول.
Views: 7
