د امریکا منتخب ولسمشر ډونالډ ټرمپ ویلي، که ټاکل شوې وي چې امریکا له افغانستان سره مرستې وکړي، نو افغانستان یې دې پوځي تجهیزات بېرته ورکړي، خو د شنونکو په اند، دغه تجهیزات د افغانانو حق دی او که امریکا یې غواړي نو بیا دې افغانستان ته د ورانیو تاوان هم ورکړي.
ټرمپ تېره ورځ په واشنګټن کې د ولسمشر په توګه د لوړې له مراسمو یوه ورځ مخکې ویلي چې د جو بایډن حکومت د میلیاردونو ډالرو په ارزښت پوځي تجهیزات افغانستان کې «دښمن» ته پرېښي دي.
ټرمپ ویلي، په افغانستان کې د امریکا پاتې پوځي تجهیزات به بېرته ترلاسه کړي.
هغه زیاته کړې: «ایا پوهیږئ چې موږ هر کال میلیاردونه ډالر له افغانستان سره مرسته کوو؟ که ټاکل شوې وي موږ دا پیسې ورکړو نو باید هغوی زموږ پوځي تجهیزات بېرته راکړي.»
ده څو ورځې مخکې د جو بایډن پر حکومت سختې نیوکې وکړې؛ ادعا یې کړې وه چې د امریکا له مالي سرچینو یې میلیاردونه ډالر د افغانستان سرپرست حکومت ته لیږدولي دي، خو دغه څرګندونې طالبانو او هم د امریکا حکومت رد کړې دي.
د سیاسي چارو شنونکی سلیم پیګیر د ټرمپ د هغو څرګندونو عملي کول سخت کار بولي چې وایي، افغانستان کې پاتې پوځي تجهیزات بېرته تر لاسه کوي.
پیګیر وایي، د امریکایي ځواکونو نظامي تجهیزات په افغانستان کې نه دي پاتې او کوم پوځي تجهیزات چې له پخوانیو افغان ځواکونو څخه پاتې دي، هغه د افغانان حق کېږي.
دی وایي: «امریکا او ناټو تېر شل کاله په افغانستان کې ډېر جنایات ترسره کړل او ټرمپ دغه څرګندوي ځکه کوي چې افغانستان له جنګي غرایمو تېر شي.»
د طالبانو ویاند ذبیحالله مجاهد څو ورځې مخکې ویلي وو چې بهرنیان دې افغانستان کې د خپلو تر سره کړو جنایتونو غرامت ورکړي.
د سیاسي چارو شنونکی محمدزمان مزمل هم وایي چې ټرمپ مخکې له دې چې د لوړې مراسم ترسره کړي، په افغانستان کې د خپلو پاتې نظامي تجهیزاتو پوښتنه کوي، خو د دوی له لاسه د وران شوي افغانستان پوښتنه نه کوي.
دی وایي، که هغه خپل نظامي تجهیزات غواړي بیا دې د تېرو شلو کلونو پر مهال د ورانیو تاوان هم ورکړي.
Views: 14
