د حماس له لوري د ازادېدونکو یرغملو د نوملړ له اعلان وروسته د اسرائیلو لومړي وزیر ویلي چې په ځايي وخت ۱۱:۱۵ به غزه کې اوربند پلی شي.
د اسرائيل او حماس ترمنځ د اوربند او د بندیانو د تبالې تړون تېره اونۍ، د امریکا، مصر او قطر په منځګړیتوب لاسلیک شو او د اسرائیل د حکومت کابینې تېره ورځ دغه هوکړه منظوره کړه.
تمه وه په ځايي وخت نن د سهار ۸:۳۰ به د غزې اوربند پلی شي خو د اسرائیلو لومړي وزیر وویل، تر هغه به د اوربند عملي نه کړي چې حماس د خوشې کېدونکو یرغملو نوملړ نه وي خپور کړی.
سرچینه زیاتوي چې اوس حماس د هغو درې تنو یرغملو نومونه اعلان کړل چې لومړي پړاو کې ازادیږي.
راپور کې راغلي، ۳۱ کلنه ډورن سټاینبرکر، ۲۸ کلنه اسرائیلي الاصله برتانوۍ ایملي دماري او ۲۴ کلنه رومي ګونن هغه درې ښځې دي چې ټاکل شوې ده په لومړي پړاو کې خوشې شي.
د اسرائیلو لومړي وزیر ویلي وو چې نن له غرمې مخکې په ځايي وخت ۱۱:۱۵ به غزه کې اوربند پلی شي.
د ۲۰۲۳ زېږدیز کال د اکتوبر په اوومه په غزه کې د حماس او اسرائیلي ځواکونو ترمنځ جګړه پیل شوې وه چې دواړه لوریو ته یې درنه مرګژوبله واړوله.
Views: 10
