سپینه ماڼۍ وايي چې له ۲۰۲۱ کال وروسته چې افغانستان ته کومې بشري مرستې استول کېږي، ګټه یې د افغانستان خلکو ته رسېږي نه د افغانستان سرپرست حکومت ته او دا مرستې په میخانيکي ډول په همدې بڼې تنظیم شوې دي.
د راپورونو له مخې، د امریکا متحده ایالتونو منتخب ولسمشر ډونالډ ټرمپ دوه ورځې مخکې (د مرغومې په ۱۸ مه) د جوبایډن د حکومت پر تګلارې د نیوکې ترڅنګ ویلي وو، واشنګټن د افغانستان سرپرست حکومت ته میلیاردونه ډالر برابر کړي دي.
هغه زیاته کړې وه: «باور نه شي کېدای، میلیونونه نه، بلکې میلیاردونه ډالر! څوک اساسآ افغانستان کې طالبانو ته میلیاردونه ډالر ورکوي؟ دا جو بایډن ورکوي.»
دا په داسې حال کې ده چې د امریکا د کانګرس ځینو غړو د هغو مرستو په اړه اندېښنه ښودلې وه چې کېدای شي د افغانستان سرپرست حکومت ته ورسېږي.
خو د سپینې ماڼۍ د ملي امنیت شورا ویاند جان کربي تېره ورځ ویلي: «افغانستان ته استول شوې بشري مرستې د افغانستان خلکو ته رسېږي نه طالبانو ته؛ دا په میخانيکي ډول په همدې بڼې تنظیم شوې دي.»
د طالبانو مرستیال ویاند حمدالله فطرت هم تېره ورځ ویلي وو چې امریکا نه یوازې پیسې نه دي ورکړې، بلکې د افغانستان د خلکو میلیاردونه ډالر یې کنګل کړي دي.
Views: 11
