له المان څخه د افغان کډوالو د ایستلو لړۍ په دوام، د دغه هېواد رسنیو راپور ورکړی چې په ۲۰۲۴ زېږدیز کال کې څه باندې ۱۳۰۰ افغان کډوال له المان څخه ایستل شوي دي.
پژواک د المان د کورنیو چارو وزارت له قوله راپور ورکړ چې په ټوله کې ۱۳۶۱ افغان کډوال په ۲۰۲۴ کال کې له دغه هېواد څخه افغانستان یا نورو هېوادونو ته لېږل شوي دي.
یادې رسنۍ راپور ورکړی چې ځینې افغان کډوال له المان څخه افغانستان ته او ځینې نور هغو هېوادونو ته لېږل شوي چې د «دوبلین قواعدو» له مخې د دوی دوسیو ته د رسېدو مسوولین دي.
د دوبلین قواعد (dublin regulation) د اروپایي ټولنې غړو هېوادونو کې د پناه غوښتنې غوښتنلیکونو د مدیریت طریقې ته ځانګړي شوي چې له مخې یې د پناه غوښتلو د غوښتنلیک څېړل هغو هېوادونو ته راجع کېږي چې د دغه قانون له نظره مسوول پېژندل کېږي.
د راپور له مخې، په ۲۰۲۴ کال کې د وړم کال په پرتله له المان څخه د کډوالو ایستلو کچه ۲۰ سلنه لوړه شوې ده.
د ویلو ده چې المان د ۲۰۲۴ کال د اګسټ میاشتې په وروستیو کې ۲۸ افغان کډوال چې جرمونه یې کړي وو، افغانستان ته راولېږل.
د المان فدرال دولت وروسته له هغې چې څو تنه افغان کډوالو په دغه هېواد کې له تاوتریخوالي ډک اقدامات ترسره کړل، د افغان کډوالو ایستلو ته یې د کار په اجنډا کې ځای ورکړ.
Views: 6
