د افغانستان کرکټ بورډ وایي، د کرکټ ملي لوبډله سبا له زمبابوې لوبډلې سره د دوو ټېسټ سیالیو په لړ کې خپله لومړۍ لوبه کوي.
د افغانستان کرکټ بورډ نن په یوه خبرپاڼه کې ویلي، افغان کرکټ ملي لوبډله به سبا د زمبابوې پر وړاندې د دوو ټېسټ سیالیو د لوبلړۍ په لومړۍ لوبه کې د سیالۍ ډګر ته ښکته شي.
یاده سیالي به د افغانستان پر وخت د غرمې په دوولسنیمو بجو د زمبابوې د بولاوایو ښار په کوینز سپورټ کلب کرکټ لوبغالي کې پیل شي چې د روانې ډسمبر میاشتې تر ۳۰مې نېټې به دوام وکړي.
د افغانستان کرکټ بورډ د تېرې لېندۍ میاشتې په ۲۶مه د زمبابوې پر وړاندې د دوو ټېسټ لوبو لپاره د حشمتالله شهیدي په لوبډلمشرۍ د لوبغاړو ۱۸ کسیزه نوملړ اعلان کړی و.
خو افغان کرکټ بورډ نن ویلي چې د کرکټ ملي لوبډلې تکړه ورو توپ اچوونکی اللهمحمد غضنفر هم د زمبابوې پر وړاندې د دوو ټېسټ سیالیو لپاره لوبډلې ته اضافه شوی دی.
هخوا بیا راشدخان تازه له ملي لوبډلې بېل شوی او په یوه رسمي سفر اروپا ته تللی دی چې په لومړۍ ټېسټ لوبه کې به د لوبډلې برخه نهوي.
دغه راز، له دې سیالیو مخکې افغان لوبډلې په همدې روانه ډسمبر میاشت کې له زمبابوې څخه د شل اووریزو او یو ورځنیو سیالیو لوبلړۍ وګټلې.
د یادونې ده، افغان کرکټ ملي لوبډله به له زمبابوې سره دویمه ټېسټ لوبه د راتلونکي ۲۰۲۵ میلادي کال د جنوري میاشتې په دویمه نېټه ترسره کړي.
Views: 17
