د یوې سروې له مخې، په افغانستان کې د کړکېچن وضعیت له امله جرمني ته تللي ډېرو افغانانو د تابیعیت ترلاسه کولو لپاره غوښتنلیکونه ورکړي او غواړي د یوې اوږدې مودې لپاره په دغه هېواد کې پاتې شي.
دغه سروې د ادغام او کډوالۍ لپاره د مشورتي شورا علمي بنسټ له لوري په انلاین بڼه د ۲۰۲۳ کال د نوامبر له میاشتې د ۲۰۲۴ کال د اپریل تر میاشتې پورې تر سره شوې ده.
په دې اړه څېړنه کې په جرمني د افغانانو د ژوند، اوسېدو او نورو ستونزو په اړه معلومات وړاندې شوې دي.
په دې سروې کې ۱۸۹۱ کسانو ګډون کړی چې ۹۰ سلنه یې نارینه او نهه سلنه یې ښځې دي، د سروې ۶۸ سلنه ګډونوال له ۲۰۲۱ کال وروسته او پاتې نور يې له دغه کال مخکې جرمني ته مهاجر شوي دي.
د دې نظرپوښتنې ۸۵ سلنه ګډونوال وایي چې د کورنۍ یوه نږدې غړی یې لکه مور، پلار، ښځه، مېړه او یا هم نور کسان په افغانستان کې پاتې دي.
د دې سروې ۷۱ سلنه ګډنوال وايي چې نږدې هره ورځ په افغانستان او یا هم نورو هېوادونو کې د خپلو کورنیو له نږدې غړو سره اړیکي نیسي او ټینګار کوي چې باید جرمني ته انتقال شي.
د سروې شوو کسانو له ډلې ډېره برخه یې وايي چې دوی په تېرو ۱۲ میاشتو کې یواځې یو ځل توانیدلي چې د خپلو کورنیو غړو ته پېسې واستوي.
د سروې له مخې، هغه افغان چې په جرمني ژوند کوي ډېرې یې اوس هم له ټولنیزو شبکو او یا هم له نورو افغانانو سره چې له مخکې په جرمني کې دي لږې اړیکي لري.
خو دغه څېړنه وايي، که چیرې دغه نوي تللي افغانان له نورو پخوانیو افغانانو سره اړیکې پیدا کړي په ډېرې اسانۍ سره کولای شي خپلې ستونزې حل کړي.
په څېړنه کې راغلي، یواځې د سروې ۲۵ سلنه ګډونوال په جرمني کې د کډوالۍ سازمانونه پېژني.
سرچینه وایي که څه هم ډېرې افغانان مخکې په جرمني کې نه دي اوسېدلي خو ځانونه په جرمني پورې تړلي احساسوي او ۶۳ سلنه یې بیا ځانونه هم د جرمني او هم د افغانستان حسابوي.
سروې وايي چې د سروې شوو کسانو له ډلې ۸۶ سلنه یې غواړي د جرمني تابیعت ترلاسه کړي او ۱۱ سلنې تر دې وړاندې د تابیعت ترلاسه کولو لپاره وړاندیزونه ورکړي دي.
سرچینه زیاتوي چې ډېری افغانان نه غواړي د افغانستان د کړکېچن وضعیت له امله بېرته هلته ستانه شي او ټینګار کوي چې باید جرمني کې پاتې شي.
په دې سروې کې راغلي چې ډېری افغانان د ادغام په برخه کې لا هم د خپلو چارو په لومړنیو پړاونو کې دي.
سرچنه وايي چې دوی باید ډېر خنډونه له منځه یوسي، څو د ټولنې برخه شي، ډېرې پېسې وګټي او د خپلې کورنیو غړي جرمني ته انتقال کړي.
په دې څېړنه کې راغلي چې ۳۲ سلنه افغانانو د استوګنې کور نیولو پرمهال، ۲۲ سلنه په دولتي ادارو کې او ۱۹ سلنه ډاکټر یا روغتون ته د وخت اخیستو پرمهال د تبیض احساس کړی دی.
سرچینه زیاتوي، یو شمېر افغانان په دې باور دي چې د جرمني سیاست د دوی ګټې او اړتیاوې تر ډېره نه تامینوي خو د ځینو نورو چې بیا اقتصادي وضیعت ښه دی هغوی برعکس احساس لري.
د سروې په پایله کې ځینې سپارښتنې هم شوې دي.
سرچینې ويلي چې ډېری افغانان غواړي د اوږد مهال لپاره په جرمني کې پاتې شي نو باید سیاستوال او مدني ټولنې ورسره د ستونزو په حل کې همکاري وکړي.
په سروې کې زیاته شوې چې د جرمني سیاستوال، مدني ټولنې، رسنۍ او د افغانانو ټولنې باید یوځای د نویو افغانانو د ستونزو د حل او تبیض له منځه وړولو لپاره کار وکړي.
سرچینې ټینګار کړی چې د کډوالۍ سازمانونه باید افغانانو ته ځانونه نږدي کړي څو د اړوندو ستونزو په حل کې ورسره همکار وکړي.
سرچیني ويلي چې په جرمني کې له افغانانو سره د کورنیو د یوځای کېدو په موخه باید په پاکستان او ایران کې د جرمني په سفارتونو کې د ویزې په ورکړه کې اسانتیاوې رامنځته شي.
د یادونې وړ ده چې د ادغام او کډوالۍ مشورتي شورا یوه خپلواکه او څو اړخیزه بنسټ دی چې د علمي او سیاسي مشورو په برخو کې فعالیت کوي.
وصال
Views: 19
