موټرچلوونکي او ځايي مسوولين وايي، د خوست غلامخان بندر له تېرو څلورو ورځو راهیسې د باروړونکو موټرو او خلکو پر مخ تړل شوی دی.
مسوولين وايي، د افغان او پاکستاني پولهساتو ځواکونو ترمنځ له وقفهیي نښتو وروسته غلامخان بندر د هر ډول تګ راتګ پر مخ تړل شوی دی.
سوداګر او د دې لارې موټرچلوونکي وایي، د دې لارې بندېدو له امله میلیونونه افغانۍ زیان ورته اوښتی دی.
یوه موټرچلوونکي نجیبالله وويل: «موږ دغه ټېلر کې له کندهاره کشمش را بار کړي، غلامخان ته چې راورسېدو، دلته بیا جنګ شروع شو، په جنګ کې خو د دواړو خواوو تاوان دی، په دې کې بیا تجارانو ته میلیونونه تاوان پېښېږي، اوس دا کشمش دي چې څلورو ورځو کې ونه رسېږي، ټول خرابېږي، یوه ټېلر کې د څلوېښت لکه افغانیو کشمش بار دي.»
يوه، بل موټرچلوونکي ظاهرشاه بيا له پژواک اژانس سره خبرو کې له دواړو حکومتونو غوښتنه وکړه چې په فرضي کرښه شته ستونزې دې د خبرو له لارې حل کړي.
دی وايي: «څلور ورځې وشوې دلته ولاړ یو، سبزیجات تول خراب شول، زموږ له حکومتونو دا هیله ده چې په خپل منځ کې جوړښت سره وکړي، په جنګ خو دا مشکل نه حل کېږي، دا خو د خبرو له لارې حل کېږي.»
ورته مهال، د خوست د سوداګرۍ او صنايعو خونې رییس نواب امیرزی وايي، دواړه حکومتونه د سوداګرۍ پر ځای سیاست ته ارزښت ورکوي چې له کبله یې د هېواد په بېلابېلو سیمو کې فرضي کرښې ته څېرمه وخت ناوخت جګړې رامځته کېږي.
نوموړي وويل: «پرون ۱۸۵موټرو ته موږ اینوایس ورکړ، دا ټول په انګورو، وچو مېوو او سبزیجاتو بار دي، هر موټر که په پنځه لکه افغانۍ حساب کړو نو څو میلیونه افغانۍ تاوان افغانانو ته پېښېږي، هیله لرو چې زموږ حکومتي چارواکي په دې برخه کې اقدام وکړي او هغه موټر چې دلته ولاړ دي، هغه وارداتي مالونه چې د غلام خان له صفري کرښې را تېر شوي، اجازه ورکړي.»
بل لور ته، د خوست د اطلاعاتو او فرهنګ رییس شبیراحمد عثماني وايي، په غلامخان بندر کې نښته لومړی د پاکستاني ځواکونو د بد چلند او لفظي شخړې له امله رامنځته شوې ده.
هغه وويل، د غلامخان لارې د خلاصون لپاره د دواړو حکومتونو ترمنځ خبرې روانې دي.
دی زياتوي: «په ټولو سرحدي سیمو کې پولهساتي ځواکونه کله نا کله د لفظي شخړو له وجهې برخورد کوي خو دا برخورد عادي وي، د غلامخان شخړه کې هم فکر کوم لفظي شخړه رامنځته شوې وه، اوس د دې شخړې د حل او د تجارتي موټرو د تګ راتګ لپاره مذاکرات روان دي، انشاءالله ښې نتیجې به ولري.»
دا په داسې حال کې ده چې څه موده مخکې هم د خوست د ځاځيمیدان ولسوالۍ اړوند ډیورنډ فرضي کرښې ته څېرمه د افغان او پاکستاني پولهساتو ځواکونو ترمنځ جګړه شوې وه.
Views: 2
