د غزې روغتيايي چارواکي وایي، تېره ورځ په غزه کې د پولیو واکسين کمپاین له پيلېدو مخکې د اسرائيل بریدونو کې لږ تر لږ ۴۸ کسانو ژوند له لاسه ورکړی دی.
رویټرز خبري اژانس د دغو څرګندونو ترڅنګ ویلي چې یاد بریدونه د غزې په مرکزي او سوېلي سیمو کې شوي دي.
د روغتیا نړۍوال سازمان رویټرز ته ویلي، په پام کې لري چې نن په غزه کې ۶۴۰ زره ماشومانو ته د پولیو واکسین کمپاین پیل کړي.
د روغتیا نړۍوال سازمان ویلي چې دوه زره روغتيايي کارکوونکي یې د واکسین پلې کېدو په موخه چمتو کړي او ۹۰ سلنه فلسطیني ماشومانو ته باید د یوې میاشتې په اوږدو کې دوه ځلې د پولیو واکسین ورکړل شي، خو زیاتوي چې د غزې تړانګه کې دغه چاره له سختو ننګونو سره مخ ده.
سرچینه زیاتوي چې له دې مخکې هم په غزه کې د جګړو پر مهال د پولیو واکسین درې درې ورځني کمپاینونه پلي شوي دي.
د راپورونو له مخې، تر دې مهاله په غزه کې د اسرائیل په بریدونو کې څه باندې ۴۰۶۰۰ فلسطینیانو ژوند له لاسه ورکړی او له ۹۰ زره ډېر نور ټپيان شوي دي.
Views: 1
