د ننګرهار عامې روغتيا ریاست وايي چې په تېرو نږدې اووه میاشتو کې په ۲۵ لویو پېښو کې ۱۹۱۴ کسان د سکبیس پر ناروغۍ اخته شوي دي.
د مسوولينو په وينا، په ۲۰۲۳ میلادي کال کې ټولې ۲۳ لويې پېښې ثبت شوې وې خو سږ کال يوازې په نږدې اووه مياشتو کې ۲۵ لويې پېښې ثبت شوې دي چې د تېر په پرتله ډېروالی ښیي.
د سکبیس/Scabies په نوم د پوستکي د دې ناروغۍ له امله ناروغانو ته د بدن خارښ او سوروالی پيدا کېږي چې د ځانګړو درملو په واسطه یې درملنه کېږي.
د ننګرهار عامې روغتيا رياست وياند نقيبالله رحيمي د زمري په ۲مه وويل، په ۲۰۲۳ کال کې د پوستکي سکبیس ناروغۍ ۲۳ لویې پېښې ثبت شوې وې چې په ترڅ کې ۱۴۹۸ کسان پر دې ناروغۍ اخته شوي وو.
هغه زياته کړه، د یادو کسانو درملنه شوې، وړیا درمل ورکړل شوي او د ناروغۍ د مخنیوي په لارو چارو ورته عامه پوهاوی ورکړل شوی دی.
د رحيمي په وينا، د ۲۰۲۴ میلادي کال په تېرو نږدې اووه میاشتو کې د سکبیس ۲۵ لویې پېښې ثبت شوي چې په ترڅ کې ۱۹۱۴ کسان پر دې ناروغۍ اخته شوي دي.
دی زياتوي: «دا کوم ارقام چې له تاسو سره شریک شول، دا يوازې په عاجلو پېښو کې دا ناروغان معلوم شوي دي، نور چې کومو روغتيايي مرکزونو ته ناروغانو مراجعه کړې هغه په دې ارقامو کې نه دي شامل، دا هغه ارقام دي چې په سيمه کې په ډلهييز ډول رامنځته شوي او زموږ صحي ټيم ورغلی او درملنه يې کړې ده.»
د روغتيا رياست وياند وویل، دغه اداره د ناروغیو بېړنيو پېښو ته د رسېدنې لپاره ځانګړی ټيم لري چې د ځینو موسسو استازي هم په کې شامل دي.
بلخوا روغتياپالان بيا د پاکو خوړو، پاکو اوبو او پاک چاپېريال موجوديت له دغو ناروغیو څخه د خلاصون لار ګڼي.
په ننګرهار کې د انتاني ناروغيو متخصص ډاکټر سيدمحمد محمدي وايي، د پوستکي ناروغۍ په عموم کې ساري وي او يوازې د ځان پاک ساتل کولی شي چې له دې ناروغۍ انسان وژغوري.
دی وايي: «زما له ټولو ننګرهاريانو څخه دا غوښتنه ده چې د اوړي په راتګ سره دوی کومې موسمي مېوې چې دي له هغې څخه ګټه پورته کړي، پاک خواړه دې وخوري، پاکې اوبه دې وڅښي او حفظالصحه دې مراعت کړي.»
ننګرهار مېشتي هم له روغتيايي مسوولينو غواړي چې د دا ډول پېښو مخنيوي لپاره دې عامه پوهاوی او د درملنې اسانتياوې ډېر کړي.
رضوانالله چې زوی يې د سکبیس پر ناروغۍ اخته شوی، وايي، له دې مخکې پر دې ناروغۍ نه پوهېده خو کله چې يې زوی ناروغ شو نو ورته متوجه شوی دی.
هغه له روغتيا رياسته وغوښتل چې په دې برخه کې دې عامه پوهاوی زيات کړي څو خلک خپل ځانونه، کورنۍ او اولادونه ترې وساتي.
دغه راز، د جلالاباد ښار يو اوسېدونکی سيدفاضل هم وايي، روغتيا رياست دې خلکو ته د موسمي ناروغيو د مخنيوي لپاره د ناروغيو له پيل وړاندې عامه پوهاوی وکړي.
د يادونې ده، د پوستکي سکبیس/Scabies ناروغي یو پرازيتي انتان دی چې له کوچنیو مايټونو (کنه) څخه منځته راځي، لومړی په پوستکي کې ننوځي، هلته هګۍ اچوي چې له امله یې شدید خارښ او سوروالی رامنځته کېږي او ډېر کله دغه ځايونه په زخمونو او یا هم جدي اختلالاتو بدلېږي.
Views: 20
