د امریکا متحده ایالتونو ولسمشر جوبایډن د دغه هېواد د ۲۰۲۴ کال په ولسمشریزو ټاکنو کې له نوماندانۍ تېر شو او ویې ویل چې له خپلې اوسنۍ مرستیالې کاملا هریس څخه د خپل ګوند د نوماندې په توګه ملاتړ کوي. بایډن دغه اعلان تېره شپه پر خپله اېکسپاڼه کړی دی.
هغه لیکلي: «دا مې د ژوند تر ټولو غوره ویاړ و چې ستاسو د جمهور ريیس په توګه مې خدمت وکړ؛ که څه هم چې بیا انتخاب کېدل مې نیت و، زه باور لرم چې دا د هېواد او ګوند په ګټه ده چې استعفا وکړم او په پاتې دوره کې یوازې د جمهور رییس په توګه پر خپلې دندې تمرکز وکړم.»
د بایډن د ولسمشرۍ دوره د ۲۰۲۵ کال د جنورۍ په ۲۰مه پای ته رسېږي.
د امریکا ولسمشر له یاد اعلان څو شېبې وروسته د ګوند کاندیدې په توګه له خپلې اوسنۍ مرستیالې کاملا هریس څخه ملاتړ څرګند کړ.
هغه لیکلي: «نن غواړم د جمهور رییس د مرستیالې کاملا هریس سره بشپړ ملاتړ او منظوري اعلان کړم چې سږ کال زموږ د ګوند کاندیده وي.»
بایډن همدارنګه پر ډیموکراتانو غږ کړی چې مخکني ولسمشر ډونالډ ټرمپ ته د ماتې ورکولو لپاره یو لاس شي.
بایډن – چې ۸۱ کاله عمر لري- د جمهوري ریاست له کاندیدۍ په داسې حال کې تېر شو چې د کرونا په ویروس د اخته کېدو له امله په خپل کور کې قرنطین دی.
د بایډن پر ځای به کاملا هریس د نومبر په میاشت کې له مخکني ولسمشر ډونالډ ټرمپ سره سیالي کوي.
که چېرې مېرمن هریس د ډیموکراتانو په ملي کنوانیسون کې چې په اګسټ کې د شیکاګو په ښار کې دایریږي، د دغه ګوند وروستۍ کاندیده شي، دا به د متحده ایالتونو په ۲۴۸ کلن تاریخ کې لومړی ځل وي چې یوه تورپوستې مېرمن چې د جنوبي اسیا ریښه هم لري، د یو ستر ګوند د کاندیدې په توګه ټاکل کېږي.
Views: 11
