د خیبر پښتونخوا په بنو کې نن لسګونه زرو خلکو د پاکستان د پوځ د پیل شوو “عزم استحکام” عملیاتو پر ضد لاریون کړی دی.
د دغه لاریون ګڼ شمېر ویډیوګانې او عکسونه په ټولنیزو رسنیو کې لاس په لاس کېږي.
لاریونکوونکي وایي: «موږ هیڅکله خپله خاوره یو ځل بیا د ډالري جنګونو برخه نه شو ګرځولی او نه د امن په نامه خپل کور او کلی پرېښودلی شو.»
هغوی زیاتوي، د خيبر پښتونخوا په بنو کې د پوځ ډراماتیک او ډالري عملیاتو پر ضد سلګونه زره خلک راوتلي او وايي چې پښتانه نور پر خپل وطن ډالري جګړې نه مني.
د پاکستان پوځ په تېره جون میاشت کې د خیبر پښتونخوا په بنو او ځینو نورو سیمو کې «عزم استحکام» په نوم د ځایي وسلهوالو پر ضد عملیات پیل کړي.
د یادونې ده، د چنګاښ په ۲۵مه په بنو کې وسلهوالو د پاکستان پوځ پر یوه مرکز لومړی د موټربم چاودنه وکړه او وروسته یاد مرکز ته ننوتل او جګړه یې پیل کړه؛ نښتې یوه ورځ دوام وکړ، د راپورونو پر اساس، په دې پېښه کې لږ تر لږه اته پاکستاني پوځیان ووژل شول او لسګونه نور کسان ټپیان وو.
د سیمې خلکو هغه مهال رسنیو ته ویلي وو چې امنیتي کسانو له برید وروسته پر عامو خلکو ډزې وکړې او مرګژوبله یې واړوله.
Views: 13
