د پاکستان بهرنیو چارو وزارت خیبرپښتونخوا کې د برید په تړاو په دغه هېواد کې د افغانستان سفارت مرستیال تېره ورځ ورغوښتی و.
د راپورونو له مخې، د روانې اونۍ د دوشنبې په ورځ وسلهوالو د خیبرپښتونخوا د بنو پر پوځي مرکز د موټربم په وسیله برید وکړ. د پاکستان د پوځ د مطبوعاتو او عامه اړيکو ادارې «ای اېس پي ار» ويلي چې په دغه برید کې اته پوځیان وژل شوي دي.
د پاکستان د بهرنیو چارو وزارت په یوه خبرپاڼه کې راغلي چې په اسلاماباد کې د افغانستان سفارت مرستیال یې تېره ورځ په دې اړه ورغوښتی دی. سرچینې د سفارت د مرستیال نوم نه دی لیکلی.
په خبرپاڼه کې راغلي: «د افغانستان له سرپرست حکومته غوښتل شوي چې د بنو د برید د عاملینو پر وړاندې په بشپړه توګه پلټنه وکړي او سمدستي، قوي او اغېزمن اقدام وکړي.»
د افغانستان حکومت تر اوسه په دې اړه څه نه دي ویلي، خو د پاکستان یادې څرګندونې او د مرستیال سفیر ورغوښتل په دا په داسې حال کې دي چې افغان چارواکو په وار، وار د پاکستان دا ډول ادعاوې رد کړې او ویلي یې دي، چا ته اجازه نه ورکوي چې د افغانستان خاوره د پاکستان پر ضد وکارول شي.
هغوی له اسلاماباده غوښتي چې خپلې ستونزې په افغانستان پورې ونهتړي.
Views: 10
