سرچینې وایي چې د خیبر پښتونخوا په دیره اسماعیل خان سیمه کې د وسلهوالو په یوه برید کې د دوو پوځیانو په ګډون لس کسان وژل شوي دي.
د پاکستان پوځ د عامه اړیکو ادارې (ایاېسپيار) د جولای په ۱۶مه په یوه خبرپاڼه کې ویلي چې وسلهوالو پرون د خیبر پښتونخوا په دیره اسماعیل خان سیمه کې پر یوه کلیوالي روغتیایي مرکز برید کړی چې وروسته په نښته کې دوه پوځیان وژل شوي دي.
دغه راز، مشال راډیو د امنیتي سرچینو له قوله راپور ورکړی چې پرون ناپېژانده وسلهوالو د دیره اسماعیل خان د «پرووه تحصیل» سیمې د شموزۍ کلي پر روغتیایي مرکز برید وکړ چې په پایله کې یې دوه روغتیاپالانې، دوه ماشومان او یو څوکیدار ووژل شول.
سرچینه زیاتوي، له برید وروسته امنیتي ځواکونو د وسلهوالو پر ضد عملیات ترسره کړل چې په نښته کې درې وسلهوال او دوه پوځیان ووژل شول.
د راپورونو له مخې، د روانې جولای میاشتې په ۱۵مه وسلهوالو د خیبر پښتونخوا په بنو کې پر یوه پوځي مرکز برید کړی و چې په کې لږ تر لږه اته پاکستاني پوځیان وژل شوي او شاوخوا ۵۰ کسان ټپیان شوي وو.
Views: 16
