د راپورونو له مخې، روسیې او اکراین ۹۰ جنګي اسیران تبادله کړي چې دا په تېرو پنځو میاشتو کې د دواړو لورو ترمنځ د بندیانو په لوی شمېر تبادله ده.
مسکو ټایمز د روسیې د دفاع وزارت له قوله راپور ورکړی چې نن د دغه هېواد لسګونه جنګي اسیران مسکو ته رسېدلي دي.
د راپور له مخې، دا تبادله د متحده عربي اماراتو په منځګړیتوب شوې ده.
دغې رسنۍ د روسیې د دفاع وزارت د یوه ويډیویي کلېپ په استناد لیکلي چې یونیفورم لرونکي سرتېري له الوتکې تر کښته کېدو وروسته په موټر کې سپرېږي.
په دغه ویډیویي کلېپ کې یوه سرتېري ویلي: «دا یوه د تمې خلاف تبادله وه، هر چا به چې لیدو خوشحاله به وو، ډېره خوندوره وه.»
بلخوا، د اکراین ولسمشر ولادیمیر زلنسکي په دې اړه ویلي چې د خپلو ټولو اسیرو سرتېرو ازادولو لپاره خپلو هڅو ته دوام ورکوي.
په راپور کې نه دي ویل شوي چې په تبادله شوو کې څو روسان او څو اکراینيان دي.
د یادونې ده، روسیې او اکراین د تېرو دوو کلونو په ترڅ کې څو ځلې جنګي اسیران تبادله کړي دي.
Views: 15
