د افغانستان کرکټ ملي لوبډله د نړۍوال شلاوریز جام سیالیو په لړ کې سبا له سویلي افریقا سره لومړۍ نیمهپایلوبه ترسره کوي.
د افغانستان کرکټ بورډ پر خپله فېسبوکپاڼه لیکلي، د کرکټ ملي لوبډله سبا د شلاوریز نړۍوال جام په لړ کې له سوېلي افریقا سره نیمهپایلوبه ترسره کوي.
کرکټ بورډ ویلي، په پلان کې لري چې یاده سیالي د کابل کرکټ لوبغالي کې پر لوی سکرین خپلو هېوادوالو ته خپره کړي.
ټاکل شوې چې د افغانستان او سوېلي افریقا کرکټ لوبډلو ترمنځ به سبا سهار د افغانستان پر خت پنځه بجې لومړۍ نیمه پایلوبه ترسره شي.
دغه سیالي د وېسټانډيز ټرېنېډاد او ټوباکو ټاپو په لوبغالي کې ترسره کېږي چې د افغانستان پر وخت به د سهار په پنځو بجو پیل شي.
همدارنګه په شلاوریز نړۍوال جام کې افغانستان، هند، انګلستان او سوېلي افریقا لوبډلې نیمه پایلوبې ته وتلې چې دویمه نیمه پایلوبه به د انګلستان او هند لوبډلو ترمنځ تر سره شي.
دغهراز د کرکټ ملي لوبډلې لوبډلمشر راشدخان په یوه ویډیویي پیغام کې له هېوادوالو غوښتي چې د سبانۍ لوبې لپاره دې ورته دعاوې وکړي.
نوموړي له هېوادوالو مننه کړې چې همیشه یې دوی ته دعاوې کړي او زیاته کړې ده چې د لوبغاړو خواري هم وه او د خلکو دعاوې هم وې او دوی یې دغه ځای ته ورسول.
راشدخان ویلي، د سوېلي افریقا لوبه ډېره مهمه او نیمه پایلوبه ده، په دغه لوبه کې هم له ټولو خلکو څخه غوښتي چې په خپلو دعاوو کې دې د ملي لوبډلې لوبغاړي یاد ساتي او دغهراز زیاته کړې یې ده چې د چا په زړه کې داسې څه خبره رانه شي؛ تکبر او غرور ترې ونه شي.
هغه وایي: «زموږ کوښښ همدا وي د ټولې لوبډلې چې میدان کې سل سلنه نه، بلکې ۲۰۰ سلنه خواري او مهنت وکړو او دغسې بریاوې خپل هېواد ته راوړو.»
د یادونې ده، افغانستان پرون په نړۍوال جام کې بنګلهدېش ته په ماتې ورکولو سره نیمهپایلوبې ته لار پیدا کړه.
Views: 20
