رسنیو راپور ورکړی چې د ایټالیا په سويلي سواحلو کې د دوو کښتیو ډوبېدو پېښه کې ۱۱ کسان مړه، ۵۱ ژغورل شوي او ۶۴ نور لادرکه دي.
الجزیرې شبکې راپور ورکړی چې دغه پېښه پرون رامنځته شوې او په خبره یې چې د تلفاتو د زیاتېدو احتمال شته.
په راپور کې راغلي چې د کډوالو لپاره د ملګرو ملتونو عالي کمېشنرۍ، د کډوالۍ نړۍوال سازمان او د ملګرو ملتونو له ماشومانو د ملاتړ صندوق (یونسیف) په یوه ګډه خبرپاڼه کې ویلي چې لومړۍ کښتۍ کې سپاره کسان د سوریې، مصر، پاکستان او بنګلهدیش هېوادونو اړوند دي.
راپور کې د ملګرو ملتونو په حواله راغلي، دویمه کښتۍ د ایټالیا په ختیځ کې چې له ترکیې را روانه وه د اور لګېدنې له امله سمندر کې ډوبه شوې چې له امله یې ۶۴ کسان لادرکه دي.
د ملګرو ملتونو ادارې ویلي چې په دویمه کښتۍ کې د افغانستان، ایران، سوریې او عراق هېوادونو اړوند کسان دي.
سرچینې د کډوالۍ نړۍوال سازمان له قوله ویلي چې په تېره لسیزه کې له ۲۷ زرو ډېر کسان د مدیترانې په سمندر کې مړه شوي دي.
Views: 40
