ننګرهار کې امنیتي مسوولین وايي چې د پاکستان له زندانونو تازه ازاد شوي ۳۲ افغانان پرون د تورخم له لارې بېرته هېواد ته راستانه شول.
تورخم کې د انټرپول پوليسو امر قاري احمد وايي، تېره ورځ ۳۲ افغانان چې تازه د پاکستان له زندانونو ازاد شوي وو، د دغه هېواد پولیسو له لوري دوی ته وسپارل شول.
هغه وايي، دغه شمېر کسان چې ډېر یې ماشومان دي، پاکستان کې په بېلابېلو پلمو زنداني شوي وو.
د نوموړي په خبره، یاد ازاد شوي کسان د ننګرهار، کونړ، خوست او لغمان ولایتونو اوسېدونکي دي چې د کډوالو عالي کمېشنرۍ او د دغه ولایت د کډوالو چارو رياست له لوري د مرستو له ترلاسه کولو وروسته رخصت شول.
د یادونې ده، څو ورځې مخکې هم د پاکستان حکومت د دغه هېواد له زندانونو ۲۵ افغان بنديان ازاد کړل او افغان لوري ته یې وسپارل.
Views: 26
