افغانستان کرکټ بورډ د اسټرالیا له لوري د شلاوریزو سیالیو راتلونکې لوبلړۍ ځنډولو په تړاو خپله خواشيني څرګنده کړې او ټینګار کوي چې کرکټ لوبه او په ټوله کې ورزش باید له سیاسي نفوذ او ملاحظاتو لرې وساتل شي.
د اسټرالیا کرکټ ادارې پرون په یوه خبرپاڼه کې ویلي وو چې په افغانستان کې د ښځو او نجونو وضعیت ته په کتو له دغه هېواد سره د شلاوریزو سیالیو لوبلړۍ ځنډوي.
ټاکل شوې وه د روان ۲۰۲۴ کال په اګسټ کې د افغانستان او اسټرالیا کرکټ ملي لوبډلو ترمنځ درې شلاوریزې لوبې ترسره شي.
د یادې پرېکړې غبرګون کې د افغانستان کرکټ بورډ په یوه خبرپاڼه کې ویلي، یو ځل بیا هم د اسټرالیا له لوري د شلاوریزو سیالیو راتلونکې لوبلړۍ ځنډولو په تړاو خپله خواشيني څرګندوي او ټینګار کوي چې د کرکټ جذبې ته په پام باید د کرکټ لوبه او په ټوله کې ورزش له سیاسي نفوذ او ملاحظاتو لرې وساتل شي؛ ځکه له کرکټ سره د ټولو افغانانو خوښۍ او ولولې تړلې دي.
سرچینه زیاتوي، د افغانستان کرکټ بورډ د اسټرالیا دولت له لوري د یاد هېواد پر کرکټ بورډ شته فشار درک کوي، خو بهتره بولي چې ورته خنډونو او ستونزو ته باید د دواړو کرکټ بورډونو د ګډ کار په پایله کې حل لارې پيدا شي.
د افغانستان کرکټ بورډ وایي چې په دې تړاو یې له اسټرالیایي لوري سره پخوا هم خبرې کړې وې او د یاد هېواد له حکومته هیله لري چې خپل سیاستونه دې پر کرکټ بورډونو نه تحمیلوي، بلکې د دې لوبې د لا ډېر پرمختګ او ملاتړ لپاره لاس په کار شي.
د سرچینې په وینا، د افغانستان کرکټ بورډ مشرتابه له دې مخکې د اسټرالیا کرکټ بورډ له مشرتابه سره د یادې موضوع د اعلان پر ځای د حللارې پیدا کولو او سلا مشورو سپارښتنه کړې وه خو سربېره پر دې بیا هم د اسټرالیا کرکټ بورډ خپله پرېکړه اعلان کړه.
د یادونې ده، د اسټرالیا پر وړاندې د نړۍوالو شلاوریزو سیالیو لوبلړۍ د ملي لوبډلې د راتلونکو سفرونو د نوي پروګرام یا FTP برخه ده چې د کرکټ نړۍوالې شورا له لوري د نهايي کېدو پر مهال په کې په خپله د اسټرالیا کرکټ بورډ مشرتابه هم شتون درلود او دغه لوبې یې منلې دي.
باید وویل شي چې اسټرالیا کرکټ بورډ په ۲۰۲۱م کال کې هم له افغانستان کرکټ بورډ سره یوازېنۍ ټېسټ لوبه لغوه کړې وه چې بیا یې وروستـه په ٢٠٢٣ کال کې هم د یو ورځنیو لوبو لوبلړۍ وځنډوله.
د خبرپاڼې په حواله، د افغانستان کرکټ بورډ یو ځل بیا پر خپل سیال لوري غږ کوي څو د کرکټ نړۍوالې شورا بشپړ غړیتوب لرونکي هېواد په توګه د کرکټ لوبې ودې او پرمختګ ته کار وکړي او خپل دولت ته قناعت ورکړي چې د کرکټ لوبې ترسره کېدو پر وړاندې خنډ ونه ګرځي، د فشار واردولو پر ځای د کرکټ ملاتړ وکړي او په هیڅ پلمه باید له افغانانو د کرکټ مینه او خوشحالي وانه خیستل شي.
خبرپاڼه کې ویل شوي چې د افغانستان کرکټ بورډ به د کرکټ نړۍوالې شورا له اصولو سره سم، د کرکټ له نړۍوالې شورا، د اسټرالیا له کرکټ بورډ او د کرکټ نړۍوالې شورا له نورو بشپړ غړیتوب لرونکو هېوادونو سره په ګډه کار وکړي، څو کرکټ د سیاسي موخو او ملحوظاتو قرباني نه شي.
Views: 17
