د افغانستان او ایریلینډ ترمنځ د کرکټ د درېیو یو ورځنیو نړۍوالو لوبو لړۍ لومړۍ لوبه نن ترسره کېږي، بلخوا افغان لوبډلمشر له خلکو د ملاتړ غوښتنه کړې ده.
دا لوبه نن (د کب ۱۷مه) د افغانستان پر وخت له غرمې وروسته د متحده عربي اماراتو د شارجې نړۍوال لوبغالي کې ترسره کېږي.
د افغانستان ملي لوبډلې لوبډلمشر حشمتالله شهیدي پرون په یوه خبري کنفرانس کې ډاډ ورکړی چې لوبډله یې د دې سیالیو لپاره بشپړ چمتووالی لري.
هغه زیاته کړه، د شارجې لوبغالي کې یې لوبډلې ډېرې سیالۍ ترسره کړې چې په باور یې د لوبغالي حالت به له دوی سره ډېره مرسته وکړي.
افغان لوبډلمشر د لوبډلې وروستیو ماتو ته په اشاره وویل، همدا یې د لوبډلې سختې شېبې دي او افغانان یې باید په همدې وخت کې ملاتړ وکړي څو یو ځل بیا د نړۍوال جام په څېر پیاوړې سیالۍ وکړي.
شهیدي د ځینو ټپي شوو افغان لوبغاړو روغتيايي حالت ته په اشاره وویل: «د سریلانکا پر وړاندې د لوبو پر مهال عظمتالله عمرزي په پښه ټپ و، «هېمسټرینګ» یې لږ درد کاوه، هغه ټېسټ سیالۍ ته هم نه و اماده او د دې یو ورځنیو سیالیو لپاره د کمپ په اولو ورځو کې نه و جوړ، خو اوس لوبېدو ته تیار شوی دی.»
دغه راز هغه ملي لوبډلې ته د راشدخان او مجیب الرحمن د بیا راستنېدو په تړاو وویل: «زه چې څومره معلومات لرم، دواړه به د ایرلینډ پر وړاندې شل اوریزو لوبو ته اماده وي.»
له دې مخکې یوازېنې ټیسټ لوبه ایریلینډ وګټله.
د دواړو هېوادونو ترمنځ له وروستیو پنځو یوه ورځنیو نړۍوالو لوبو څلور افغانستان او یوه ایرلینډ ګټلې ده.
د افغانستان او ایریلینډ ترمنځ تر اوسه ۲۹ یوه ورځنۍ نړۍوالې لوبې شوې چې ۱۵ افغانستان او ۱۳ ایریلینډ ګټلې او یوه بې نتیجې وه.
Views: 88
