د امریکا د بهرنیو چارو وزارت وایي چې هېواد یې له افغانستان سره د بشري مرستو تر ټولو لوی مرسته کوونکی او دغه راز د افغانستان د خلکو ملاتړ کوونکی دی.
د امریکا د بهرنیو چارو وزارت ویاند مټیو مېلر تېره ورځ په یوې خبري ناسته کې له افغانستان سره د مالي مرستو بودجې کمښت په اړه د یوې پوښتنې په ځواب کې ویلي چې امریکا د افغانستان زېربنایي اقتصادي مسایلو ته د رسېدنې په لټه کې ده څو دغه هېواد کې انساني ناورین کم کړي.
مېلر ویلي: «یو له هغو کارونو چې موږ یې ترسره کولو ته دوام ورکوو د لوی اقتصاد زېربنایي مسایلو ته رسېدنه ده چې د اوسني بشري مرستو د لا اغېزمنتیا لپاره لازم ثبات برابروي او د ډېرو هغو مسایلو کمولو کې چې په افغانستان کې د انساني ناورین لامل دي، مرسته کوي.»
د امریکا بهرنیو چارو وزارت ویاند دې ته په اشارې چې امریکا افغانستان کې د بشري مرستو تر ټولو لوی مرسته کوونکی دی، زیاته کړې چې امریکا د ۲۰۲۱ کال د اګست میاشتې راهیسې د افغانستان له خلکو سره څه باندې دوه میلیارد ډالره مرسته کړې ده.
هغه دا څرګندونې په داسې حال کې کړې چې دمګړۍ له افغانستان سره د مرستو پروګرامونه د بودجې له کمښت سره مخ دي.
د ملګرو ملتونو د بشري مرستو همغږي کوونکي دفتر (اوچا) ویلي چې په ۲۰۲۴ کال کې له افغانستان سره د مرستو په موخه د ۳،۰۶ میلیاردو ډالرو د اړتیا وړ له بودجې تر اوسه یوازې ۸۷ میلیونه ډالر تامین شوي دي.
د دغه بنسټ په خبره، ۲۰۲۴ کال کې په افغانستان کې ۲۳،۷ میلیون کسان بشري مرستو ته اړتیا لري.
Views: 9
