راپورونه وايي چې په خیبر پښتونخوا او بلوچستان کې د پرلهپسې ورښتونو، د ځمکې ښویېدو او د خونو چتونو لوېدو پېښو کې د ښځو او ماشومانو په ګډون ۳۶ کسان مړه او ۵۰ نور ژوبل شوي دي.
اسوشیټېډ پرېس خبري اژانس راپور ورکړی چې پرون په خیبر پښتونخوا کې د پرلهپسې ورښت له امله د یوې ودانۍ چت لوېدو پېښه کې د ۱۸ ماشومانو په ګډون ۳۰ کسان مړه شوي دي.
سرچینې دغه راز زیاته کړې چې په دغه ایالت کې د ځمکې ښویېدو پېښه هم رامنځته شوې چې له امله یې یو کس مړ شوی او ۱۵۰ کورونه ویجاړ شوي دي.
د سرچینې په حواله، د بلوچستان د بېړنیو حالاتو ادارې مشر جهانزېب خان ویلي چې په دغه ایالت کې د تېرې جمعې او شنبې ورځو کې د یو شمېر کورونو د خونو چتونو لوېدو پېښو کې پنځه کسان مړه شوي دي.
د بلوچستان اعلی وزیر سرفراز بګټي ویلي چې د ورښتونو له امله ۷۰۰ کورونه هم زیانمن شوي دي.
راپور زیاته کړې، له تېرې پنجشنبې راهیسې د سختو ورښتونو له امله زرګونه ښوونځي تړل شوي او همدارنګه د ځمکې ښویېدنې او سېلابونو راتلو نتیجه کې د بلوچستان د څو سیمو لارې هم تړل شوې دي.
د سرچینې د معلوماتو له مخې، تېر کال په پاکستان کې موسمي بارانونو شاوخوا ۳۳ میلیون کسان اغېزمن کړي او ۱۷۳۹ نور یې له امله مړه شوي وو.
Views: 6
