د کرکټ په شپږو لوبو کې له ماتې وروسته افغانستان وکولای شول له سریلانکا یوه شلاوریزه لوبه وګټي او په دې سره یې د دې سیالیو سفر پای ته ورساوه.
د افغانستان او سریلانکا ترمنځ وروستۍ او درېیمه شلاوریزه لوبه چې د چهارشنبې په ورځ (د کب ۲مه) ترسره شوه، پچه یې افغانستان وګټله او لومړی یې د توپوهنې پرېکړه وکړه.
دا ځل د افغانستان د پیل لوبغاړو ښه لوبه وکړه او تر ۸۸ پورې منډې یې وکړې، د حضرتالله ځاځي له سوځېدو وروسته لوبډلمشر ابراهیم ځدراڼ هم ژر وسوځېد، خو رحمنالله ګربز، محمدنبي، عظمت عمرزي او محمداسحق ښه لوبه وکړه.
افغانستان وکولال شول په ۲۰ اورونو کې د پنځو لوبغاړو په سوځېدو سره ۲۰۹ منډې وکړي او سریلانکا ته یې د ۲۱۰ منډو هدف ورکړ.
د افغانستان له لوري ګربز ۷۰، ځاځي ۴۵، عمرزي ۳۱، نبي او اسحق ۱۶، ۱۶ مندې وکړې.
د سریلانکا لوبډلې هم ښه لوبه وکړه او هدف ته یې ځان نږدې کړی و خو په ۲۰ اورونو کې یې د شپږو لوبغاړو په سوځېدو سره ۲۰۶ منډې جوړې کړې، دغه راز افغانستان دا لوبه د درېیو منډو په توپیر وګټله.
د افغانستان له لوري محمدنبي ۲، قیس، نوراحمد او فرید ملک یو یو لوبغاړي وسوځول، ګربز د لوبې غوره لوبغاړی اعلان شو.
له دې مخکې سریلانکا له افغانستانه یوه ټسټلوبه، درې یوه ورځنۍ نړۍوالې او دوه شلاوریزې لوبې ګټلې وې.
Views: 9
