افغانستان لپاره د امریکا سفیرې کرن ډیکر له ملګرو ملتونو او قطر څخه مننه کړې چې د افغانستان په تړاو یې دوحه کې غونډه جوړه کړې وه.
مېرمن ډیکر د کب په لومړۍ نېټه په اېکس شبکې لیکلي: “له ملګری ملتونه او قطر څخه په دوحه کې د افغانستان په اړه د نړۍوالو همکاریو په اړه چې د سفیرانو او افغانانو د خبرو اترو لپاره کوربه توب کړی، مننه کوو. “
هغې زیاته کړې، د افغانستان خلکو او مدنی ټولنې پر وړاندې د امریکا متحده ایالاتو ژمنتیا قوي ده او دوی د افغانستان په هکله د افغانانو نظریاتو اوریدو ته سترګې په لار دي.
د افغانستان په تړاو د دوحې دوه ورځنی کنفرانس چې د ملګرو ملتونو د سرمنشي انټوني ګوټیرش په مشرۍ جوړ شوی و، پرون ماښام پای ته ورسېد.
په دې کنفرانس کې د ۲۸ هېوادونو او نړېوالو سازمانونو پلاوو او ځانګړو استازو برخه اخیستې وه.
دوحې ناسته کې افغانستان لپاره ځانګړی استاز ونه ټاکل شو؛ ګوټیرش وایي نورې سلا مشورې کوو.
د ملګرو ملتونو سرمنشي انتونی ګوټیرش د کنفرانس په پای کې یوې خبري غونډې ته وویل، چې د دوحې کنفرانس ګډونوال افغانستان لپاره د ځانګړي استازي له ټاکل کېدو سره موافق وو، خو پر دې موضوع به لا نورې سلا مشورې وشي.
نوموړي د دوحې کنفرنس ډېره ګټوره وبلله او ویې ویل چې ګډونوالو پکې د افغانستان په تړاو مهمې خبرې او بحثونه وکړل.
ده زیاته کړه، د افغانستان سرپرست حکومت ته یې بلنه ورکړې وه چې غونډې ته راشي، خو هغوی یې بلنه ونه منله. ګوتېرش هیله وښوده چې د هغوی استازي په راتلونکي کې په دا ډول نورو غونډو کې ګډون وکړي.
نوموړي د دوحې د غونډې د هدف په اړه وویل: “موږ د یو سوله ییز افغانستان غوښتونکي یو، داسې افغانستان چې هم له ځان او له خپلو ګاونډيانو سره په سوله کې وي او د یو ملي حاکمیت لرونکي هېواد په توګه د خپلو نړیوالو ژمنوعملي کولو توان ولري. “
ده زیاته کړه: “افغانستان باید د اورپکۍ مرکز نه شي، د ښځو او نجونو حقونو ته په کې درناوی وشي او داسې حکومت په کې وي چې ټول قومونه په کې برخه واخلي.”
Views: 18
