د مونيخ ناستې په څنډه کې د ۱۲ هېوادونو بهرنیو چارو وزیرانو د ګډې اعلامیې په خپرولو په افغانستان کې پر بشري وضعیت اندېښنه ښودلې ده.
د مونيخ امنيتي ناسته د نړۍ د ۱۸۰ هېوادونو چارواکو په ګډون د سلواغې په ۲۷مه پيل شوې او درې ورځې به دوام وکړي.
د راپورونو له مخې، د ۱۲ هېوادونو (البانیا، انډور، بلجیم، کاناډا، فرانسې، جرمني، بلغاریا، کوسوو، لیختن اشتاین، منګولیا، نیدرلانډ او رومانیې) بهرنیو چارو وزیرانو د مونیخ امنیتي کنفرانس په څنډه کې ناسته کړې او په یوه ګډه اعلامیه کې یې په افغانستان کې بشري، په ځانګړي ډول د ښځو او نجونو حقونو وضعیت اندېښمنوونکی بللی او ویلي یې دي چې په تېر یو کال په دې برخه هیڅ پرمختګ نه دی شوی.
په اعلامیه کې راغلي چې له شپږم ټولګي پورته د نجونو او ښځو پر زدهکړو او په ځینو ادارو کې د ښځو پر کار بندیز د «سیستماتیک تبعیض» بېلګې دي.
سرچینه زیاتوي: «سخت قوانین چې د ښځو حرکت له ازادۍ سرغړونه ده او په عامه ژوند کې ښځې او نجونې له ګډونه منع کوي، په خپلسر د ښځو نیول او جبري ودونو قضیې د ښځو او نجونو له حقونو ښکاره انکار دی.»
په اعلاميه کې د طالب له چارواکو غوښتل شوي چې نړېوال قوانین، په ځانګړي ډول د بشري حقونو قوانین رعایت کړي، د قومي او مذهبي اقلیتونو په ګډون د ټولو افغانانو اساسي حقونو ساتنه وکړي او ټولې هغه پرېکړې چې د ښځو او نجونو اساسي حقونه محدودوي او په ټوله نړۍ کې بېساري دي، لغوه کړي.
خو د طالبانو ویاند ذبيحالله مجاهد وايي چې د مونیخ غوڼده کې په دې اړه ښودل شوې اندېښنې بېځایه دي.
هغه وايي، د ښځو په ګډون د ټولو اتباعو حقوق خوندي دي، خلک ځاني، مالي، عرضي او روحي امنیت لري، د محاکمو دروازې بې له تفکیک او توپیرخه د افغانانو پر مخ خلاصي دي، حقوقو ته یې رسېدنه کېږي؛ هېواد د اقتصادي رفاه پر لور حرکت کړی، د کرنسۍ ارزښت ساتل شوی، لویې پروژې پیل شوې، په روغتيايي، ښوونيزو او عمراني برخو کې فوقالعاده کار شوی او لا هم ښې برنامې تر لاس لاندې دي.
Views: 9
