په اروپا کې مېشت د افغانستان مشهور ټولنیز او سیاسي فعال قاري عیسی محمدي د ایران په مشهد هوایي ډګر کې تر نظارت لاندې دی او د ایران لخوا ورته د سفر اجازه نه ورکول کېږي.
هغه وصال تلوېزیون ته وویل چې درې اونۍ مخکې ایران ته د سوداګرۍ لپاره تللی و، پرون د ایراني امنیتی کسانو لخوا ونیول شو خو بیرته یې خوشې کړ.
خو ده وویل، نن چې غوښتل یې له مشهد څخه ترکیې ته ولاړ شي؛ نو ایراني چارواکو ورته د سفر اجازه نه ورکوي او هلته یې ایسار کړی دی.
ده زیاته کړه، نه پوهېږي چې ایراني چارواکو ولې ورته د سفر اجازه نه ورکوي.
قاري عیسی محمدي چې د جرمني تابعیت هم لري، له کلونو راهیسې د دغه هېواد په فرانکفورټ ښار کې مېشت دی او د افغاني توکو او د موبایلونو تجارت کوي.
د یادونې وړ ده چې هغه په تېر جمهوري نظام کې هم پر حکومت او چارواکو سختې نیوکې کولې، خو په ټوله کې د طالبانو سخت مخالف او پر هغوې سختې نیوکې کوي.
قاري عیسی محمدي په دې وروستیو کې د افغانستان د مقاومت جبهې او نورو بهرنیو سازمانو لخوا په جوړ شویو کنفرانسونو کې هم ګډون کړی او د افغانستان د سرپرست حکومت پر پالیسیو یې نیوکې کړې دي.
Views: 19
