د امریکا متحده ایالتونو بهرنیو چارو وزارت په یوه ستراتیژیک سند کې راغلي چې دغه هېواد په افغانستان کې د کونسلي خدمتونو د پیل لپاره هڅې کوي خو د دغه وزارت یوه ویاند ویلي چې په لنډ وخت کې داسې کوم پلان نشته.
طالبان هم دغه چاره یو ښه ګام بللی.
امریکا غږ د افغانستان په اړه د امریکا متحده ایالتونو د بهرنیو چارو وزارت ستراتیژيک سند چې په ۲۲ مخونه کې برابر شوی، خپور کړی دی؛ دغه سند د اکتوبر په ۳۱مه تایید شوی خو تر دې دمه یاد وزارت نه دی خپور کړی.
د افغانستان بیارغونې لپاره د امریکا د څار ادارې یا سیګار هم په دې اړه راپور خپور کړی دی.
په سند کې راغلي چې امریکا د خپلو وګړو او افغان همکارانو ایستلو لپاره په افغانستان کې د کونسلي خدمتونو بیا پیلولو هڅې کوي.
راپور زیاتوي چې د کونسلي خدمتونو بیا پیلولو وړاندیز د افغانستان لپاره د امریکا متحده ایالتونو په یاد سند کې شوی چې د تېر ۲۰۲۳ زیږدیز کال په اکتوبر میاشت کې تایید شوی دی.
په دغه سند کې راغلي: «تر هغه چې امریکا، طالبان د افغانستان د مشروع حکومت په توګه پر رسمیت پېژني، موږ باید اغېزناکې اړیکې جوړې کړو چې زموږ موخو ته وده ورکړي او له موږ سره د خپلو ژمنو پوره کولو لپاره د طالبانو چمتووالي او وړتیا په اړه مو پوهاوی زیات کړي.»
سرچینې لیکلي چې امریکا به د افغانانو بنسټيزو حقونو، په ځانګړې توګه د نجونو او ښځو حقونو په تړاو خپلو خبرو ته دوام ورکړي.
په یاد سند کې زیاته شوې: «په دغه ستراتيژۍ کې د امریکا موخې له ترهګرۍ سره د مبارزې، سیمهییزو اړیکو، اقتصادي مرستو، په افغانستان کې د امریکايي وګړو لپاره کونسلي خدمتونو، د بندیانو خوشي کولو او د افغانانو، په ځانګړې ډول د نجونو له بنسټيزو حقونو دفاع کول دي.»
سرچینه زیاتوي: «په افغانستان کې له امریکایي وګړو سره د مرستې او له هغه هېواده د افغان همکارانو راایستلو لپاره موږ په دوحه کې له خپل سفارت او د قطر له حکومت سره په دې اړه ګډ کار کوو، د پاسپورټ ترلاسه کولو لارښود لپاره د ستنډرډ عملیاتي تګلارې پر جوړولو کار روان دی څو له امریکایي وګړو سره د بېړنۍ مرستې او بېرته ستنولو لپاره یې په افغانستان او نورو هېوادونو کې یوه شبکه رامنځته شي.»
د طالبانو ویاند ذبیحالله مجاهد په افغانستان کې د امریکا کونسلي خدمتونو بیا پیلېدو هڅو په اړه طلوع نیوز ته ویلي: «دا به یو ښه ګام وي چې پورته شي؛ ځکه د ډیپلوماتیکو اړیکو له پیل سره به خبرې اترې ډېرې شي، د شکونو او ناسمو نظرونو مخه به ونیول شي او دواړه لوري به وکولی شي مثبت تعامل وکړي.»
د امریکا غږ انګلیسي څانګې بیا د امریکا متحده ایالتونو د بهرنیو چارو وزارت د یوه ویاند له قوله لیکلي چې د امریکا په دریځ کې کوم بدلون نه دی راغلی او په لنډ وخت کې په کابل کې د دغه هېواد د کوم د ډیپلوماتیک فعالیت پیلولو پلان نشته.
په داسې حال کې چې د امریکا یاد ستراتیژیک سند کې «کابل ته بېرته ګرځېدل» یاد شوي، یاد ویاند د دغه ماموریت د فزیکي موقعیت او عملیاتو په اړه پوښتنې نه دي ځواب کړې.
امریکا په افغانستان کې د وړم کال له تحول وروسته په افغانستان کې ديپلوماتیکې چارې ودرولې او اوس مهال د افغانستان لپاره د امریکا سفارت له قطره فعالیت کوي.
Views: 15
