د ملګرو ملتونو په سرپرستۍ کې د قطر پلازمینې دوحه کې د افغانستان په تړاو د کېدونکې دویمې نړېوالې غونډې نېټه په ډاګه شوې ده، بلخوا د افغانستان سرپرست حکومت وایي، چې دوی ته هم په کې د ګډون بلنه ورکړل شوې.
له ریاست الوزراء څخه د سلواغې په ۵مه، په یوه خپره شوې خبرپاڼه کې راغلي چې افغانستان لپاره د ناروې سرپرست سفیر پال کلومان د ریاست الوزراء سیاسي مرستیال مولوي عبدالکبیر سره د لیدنې پر مهال د دوحې د دویمې غونډې په اړه معلومات ورکړي دي.
هغه زیاته کړې، چې په نړۍ کې پر روان کړکېچ سربېره افغانستان له نړۍ څخه نه دی هېر شوی او د راتلونکې فبرورۍ میاشتې پر ۱۸ نېټه به په دوحه کې د افغانستان په تړاو نړېواله غونډه ترسره شي.
سرچینې ویلي، مولوي عبدالکبیر په دې لیدنه کې له ناروې او نورو اروپايي هېوادونو څخه غوښتنه وکړه، چې په کابل کې خپل سفارتونه پرانېزي او فعالیت ته دوام ورکړي.
د ریاست الوزراء سیاسي مرستیال وویل، د دوحې په راتلونکې ناسته کې دوی ته هم بلنه ورکړل شوې او ټینګار یې وکړ، چې دوی د ښځو او نجونو د تعلیم مخالف نه دی او په دې اړه د امارت د مشر په هدایت ځانګړې کمېټه کار کوي، چې تعلیم ته زمینه برابره کړي.
بلخوا د ملګرو ملتونو د عمومي سرمنشي ویاند هم ویلی، چې د دغه سازمان په کوربتوب به د راتلونکې فبرورۍ میاشتې په ۱۸ او ۱۹ مه د قطر پلازمینه دوحه کې د افغانستان په اړه دوییمه مشورتي غونډه جوړه شي.
دوجاریک چې په نیویارک کې یې خبري غونډې ته وینا کوله، وویل چې د دوحې په دې غونډه کې به د افغانستان لپاره د یو شمېر هیوادونو ځانګړي استازي او د سیمه ییزو سازمانو استازي برخه واخلي.
هغه زیاته کړې: ” ددې غونډې موخه پر دې بحث کول دي چې څرنګه د افغانستان په اړه د خپلواک ارزونکي سپارښتونو ته د پاملرنې په ګډون په لا همغږۍ او رغنده ډول سره نړیواله بوختیا زیاتولی شو”.
د ملګرو ملتونو د عمومي منشي د ویاند د وینا له مخې د دغې غونډې د جوړیدو په اړه کار لا روان دی.
بلخوا د بشري حقونو د څار سازمان د ښځو د چارو مرستیالې هیدر بار د دوحې په غونډه کې د افغان میرمنو د استازو په ګډون باندې ټینګار کړی او د ملګرو ملتونو څخه یې غوښتي چې په دې راروانه غونډه کې دې افغان میرمنو ته په پشپړ ډول د ګډون امکانات برابر کړي.
دا په داسې حال کې ده، چې افغانستان لپاره د اروپایي ټولنې سفیرې دوه ورځې مخکې د کورنیو چارو وزارت له سرپرست سراجالدین حقاني سره د افغانستان لپاره دوحه کې د جوړېدونکې غونډې په اړه خبرې کړې وې.
دا په داسې حال کې ده، چې د ۲۰۲۳ زیږدیز کال په می میاشت کې هم د ملګرو ملتونو لخوا د افغانستان په تړاو لومړۍ مشورتي غونډه شوې، خو د افغانستان سرپرست حکومت ته په کې بلنه نه وه ورکړل شوې.
ملګرو ملتونو د دوحې د غونډې هدف “د طالبانو سره د تعامل په اړه د نړیوالې ټولنې یو ګډ تفاهم ته لاس رسی” ښودلی وو.
د ملګرو ملتونو په کوربتوب افغانستان لپاره د یو شمیر هیوادونو د ځانګړو استازو په دغه غونډه کې د چین، فرانسې، جرمني، هند، اندونیزیا، ایران، جاپان، قزاقستان، قرغیزستان، ناروی، پاکستان، قطر، روسیې، سعودي عربستان، تاجیکستان، ترکیې، ترکمنستان، متحده عربي امارات، بریتانیا، امریکا متحده ایالاتو، اوزبیکستان، اروپايي ټولنې او د اسلامي همکاریو سازمان استازو ګډون کړی وو.
د دوحې په غونډه کې د بشري حقونو په ځانګړي ډول د ښځو او نجونو حقونو، ټولشموله حکومت جوړیدل، تروریزم او نشه يي توکو سره د مبارزې په اړوند مسلو خبرې شوې وې.
د افغانستان سرپرست حکومت وایي، چې په دا ډول غونډو کې باید دوی ته هم د ګډون بلنه ورکړل شي.
Views: 11
