له ایرانه د افغان زندانیانو د رالېږد کمېسیون معلوماتو له مخې، دا مهال په دغه هېواد کې شاوخوا پنځه زره افغانان د بېلابېلو جرمونو په تور بندیان دي.
دغه څرګندونې د افغانستان د زندانونو چارو د سمون ادارې له ایرانه د افغان بندیانو د رالېږد کمېسیون د معلوماتو پر بنسټ په یوه خبرپاڼه کې کړې دي.
د سرچینې څرګندونو له مخې، د مشرتابه په سپارښتنه او د یاد کمېسیون د هلو ځلو په پایله کې تېر کال په درېېو پړاوونو کې د ښځو په ګډون څه باندې ۱۱۰۰ افغان بندیان افغانستان ته رالېږدول شوي او د زندانونو چارو د سمون ادارې ته سپارل شوي دي.
خبرپاڼه کې راغلي چې د یادې ادارې رییس مولوي محمدیوسف مستري په کابل کې د ایران د قضائیه قوې له څلور کسیز پلاوي سره لیدلي.
سرچینې لیکلي چې مولوي مستري یاد پلاوي ته په افغانستان کې د محبسونو، توقیفخونو او د ماشومانو اصلاح او روزنې مرکزونو په اړه معلومات ورکړل.
دغه راز د زندانونو چارو سمون ادارې مشر یاد پلاوي ته د ښځینه او نارینه محبوسینو، توقیفیانو او محجوزینو لپاره د ژوندانه چمتو شوو اسانتیاوو او هغوی ته د دیني او عصري علومو او کسب ورزده کولو په اړه معلومات وړاندې کړل.
د خبرپاڼې له مخې، یاد ایراني پلاوي ژمنه کړې چې هېواد یې د زندانونو چارو سمون له ادارې سره هر ډول مرستې او همکارۍ ته چمتو دی.
Views: 12
