هندوستان د ۱۹ کلنو لوبډلو ترمنځ د یوه ورځني کرکټ په درې اړخیزه سیالیو کې افغانستان ته ستره ماتې ورکړه.
د افغانستان، هند او سوېلي افریقا د ۱۹ کلنو لوبډلو ترمنځ دا سیالۍ په سوېلي افریقا کې روانې دي.
د هند ۱۹ کلنو لوبډلې پچه وګټله او لومړی یې افغانستان ته د توپوهنې بلنه ورکړه. افغان لوبغاړو یو ځل بیا د هند پر وړاندې سمه لوبه ونه کړه او ټوله لوبډله په ۳۳ اوور کې په ۸۸ منډو وسوځېدله او هند ته یې د ۸۹ منډو هدف ورکړ.
د هند لوبډلې یاد هدف په دولسم اوور کې د یوه لوبغاړي په سوځېدلو ترلاسه او لوبه یې وګټله.
د یادونې ده، افغانستان په درې اړخیزه سیالیو کې تر اوسه دوه لوبې ترسره کړي چې سوېلي افریقا ته یې ماتې ورکړې او هندوستان ته یې بیا لوبه بایللې ده.
په دې سیالیو کې به هره لوبډله له بلې سره دوه-دوه لوبې کوي.
Views: 21
