د پاکستان کورنیو چارو وزارت د دغه هېواد د پنجاب صوبې ځايي چارواکو ته امر کړی چې له افغان سوداګرانو او کډوالو سره د غیرعادلانه چلند او ځورونې تورونو په اړه څېړنه وشي.
اکسپرس تریبون ورځپاڼې راپور ورکړی چې اسلاماباد کې د افغانستان سفارت مسوولینو له پاکستاني چارواکو سره په لیدنه کې ویلي، هېواد ته د ناقانونه کډوالو راګرځولو بهیر کې پولیسو هغوی او قانوني اسناد لرونکي افغان سوداګر ځورولي دي.
د افغانستان سفارت چارواکو په یاده لیدنه کې ویلي، د یاسین او محمدعلي په نوم دوه افغانان چې قانوني اسناد هم لري، د حمید په نوم پاکستاني پولیس له خوا ځورول شوي دي.
د پاکستاني رسنیو د راپور له مخې، د دغه هېواد د کورنیو چارو وزارت د هغو افغانانو پر وړاندې چې قانوني اسناد لري د پولیسو د ناوړه چلند او ځورونې تورونو د څېړلو امر کړی دی.
د یادونې ده، دوو وروستیو میاشتو کې نږدې ۵۰۰ زره افغان کډوال له پاکستانه په زور ایستل شوي دي.
Views: 18
