د کاناډا د کډوالۍ او تابعیت ادارې اعلان کړی چې ۳۴۵ نور افغان کډوال د تخلیې پروګرام په چوکاټ کې له پاکستانه کاناډا ته لېږدول شوي دي.
یادې ادارې د پنجشنبې ورځ (د لېندۍ ۲۳مه) ناوخته پر خپله اېکسپاڼه د یوه پیغام په خپرولو لیکلي چې یاد شمېر افغان کډوال په یوه چارټر الوتنه کې ټورنټو ته ولېږدول شول.
د کاناډا د کډوالۍ او تابعیت ادارې معلوماتو له مخې، یوه اونۍ مخکې هم ۳۳۳ افغان کډوال له پاکستانه کاناډا ته لېږدول شوي وو.
د ویلو ده، کاناډا په تېرو دوو کلونو کې افغان کډوال له پاکستان، تاجکستان او متحده عربي امارتو په چارټر الوتنو کې دغه هېواد ته لېږدولي دي.
د کاناډا د کډوالۍ او تابعیت ادارې په وینا، د ۲۰۲۱ کال له اګسټ راهیسې ۴۳ زره او ۸۳۵ افغان کډوال یاد هېواد ته لېږدول شوي او ځای پر ځای شوي دي.
Views: 15
