د قطر او اندونیزیا لخوا په دوحه کې د افغان نجونو او مېرمنو پر کار او زده کړو د لګول شویو محدودیتونو په تړاو دوه ورځنی نړېوال کنفرانس نن په دوحه کې پیلېږي.
د “زده کړې هغې ته” تر عنوان لاندې دغه دوه ورځنی کنفرانس چې نن یکشنه د (لېندۍ په ۱۹مه) په دوحه کې پیلېږي، په کې د سرپرست حکومت له خوا د افغان مېرمنو او نجونو پر زده کړو د لګېدلو محدودیتونو او ورته د حل لارو د لټولو په اړه یو شمیر نړیوال کارپوهان او د ځینو حکومتونو استازي به خبرې وکړي.
دغه کنفرانس د قطر د کړکیچ او بشري څیړنو د مرکز له خوا د قطر او اندونیزیا د بهرنیو چارو وزارتونو سره په همغږۍ جوړېږي.
په دوحه کې د کړکېچ او بشري څېړنو د مرکز لخوا په یوه خپره شوې خبرپاڼه کې ویل شوي چې په دې ورکشاپ کې به وتلي کارپوهان، د نړسوالو سازمانونو استازي او د افغانستان په چارو کې د ښکېلو غاړو استازي زده کړو ته د افغان مېرمنو د لاسرسي پر وړاندې د پرتو خنډونو په اړه به خپل نظریات ګډونوالو سره شریک کړي.
سرچینې زیاته کړې : “ددغه ورکشاپ موندنې به یوه ورځ وروسته د دوحه ټولنې او د پالیسۍ جوړونکو ګډون کوونکو او مفکرینو ته وړاندې شي، هغوی به سږکال د “ګډې راتلوونکی د جوړولو” ترنامه لاندې په دوحه کې سره راټلویږي”.
بلخوا د قطر د بهرنیو چارو وزارت په یوه خبرپاڼه کې ویلي، چې پرون یې له اندونیزیا سره په ګډه د دې نړېوال کنفرانس د ملاتړ په تړاو ورکشاپ جوړ کړی و .
سرچینې زیاته کړې، دغه ورکشاپ ته د قطر بهرنیو چارو وزارت د اسیا د برخې مسوول یوسف بن سلطان وویل چې هېواد یې د افغان نجونو د تعلیم او د ښځو د کار له حقونو څخه ملاتړ کوي .
هغه زیاته کړه، زده کړې د انسانانو یو له بنسټیزو حقونو څخه دي او دې سره دوی خپل راتلونکی جوړوي.
دغه راز د اندونیزیا د بهرنیو چارو وزارت د سویلي اسیا د برخې مسوول جاتمیکو پراسیټیو وویل چې دغه ستونزه باید ژر تر ژره هواره شي او په دې برخه کې یې د نړۍوالې ټولنې د ملاتړ غوښتنه وکړه.
د دغه ورکشاپ تنظیموونکو په یو بیان کې ویلي چې قطر او اندونیزیا پرملتونو د زده کړو ژوره اغیز او د زده کړو له لارې د افغان میرمنو د ځواکمنیدلو اهمیت خورا زیات درک کوي.
سرچینې زیاته کړې، په دې برخه کې د ورکشاپ ټول شوي معلومات به د راتلوونکواساسي سپارښتونو په توګه په دوحه کې په لوړه کچه جوړیدونکي دوییمې غونډې ته وړاندې شي.
په خبرپاڼه کې راغلي، د جګړې، لوږې طبیعي ناورینونو، بې ځایه کیدو او جنسیت پر بنسټ توپیرونو څخه زیږیدلې ننګونو ته به پاملرنه وشي او ورکشاب به په دغو موضوعاتو یو ژور بحث وکړي او داسې سترایژیو ته به وده ورکړي چې ښځو ته د زده کړو زمینه برابره کړي.
د دې ورکشاپ تنظیموونکو ویلي چې په دې ورکشاپ کې به افغان، عرب او نړیوال تخنیکي ماهران، پوهان، فعالان اوسیاسیون د حکومتي، غیر حکومتي او نړیوالو او اکاډمیکو ادارو پوهان برخه واخلي.
د کړکیچ او بشري څیړنو مرکز د دې دمخه هم د افغانستان د وضعیت په اړه یوشمیر کنفرانسونه جوړ کړي دي.
د افغانستان سرپرست حکومت تر اوسه د دې کنفرانس په اړه کوم غبرګون نه دی ښودلی.
د یادونې وړده چې په ۲۰۲۱ کال کې د افغانستان د جمهوري دولت تر سقوط وروسته رامنځته شوي سرپرست حکومت له شپږم ټولګي د نجونو پر زده کړو او د ښځو پر کار بندېزونه لګولي دي.
Views: 16
